O‘zbekistonning Belgiyadagi elchisi Dilyor Hakimov Belgiyaning DSEC kompaniyasi rahbariyati bilan uchrashdi. Uchrashuvda Toshkent viloyati hududida shakar ishlab chiqarishni yo‘lga qo‘yish bo‘yicha loyihani amalga oshirish istiqbollari muhokama qilindi. Bu haqda UzDaily xabar berdi.
Shu maqsadda ehtimoliy zayomchilar, jumladan Germaniyaning Commerzbank banki bilan O‘zbekistonga kredit berish hamda Yevropa kredit sug‘urtachilari guruhi Credendo bilan loyihani amalga oshirish bilan bog‘liq xatarlarni qoplash bo‘yicha dastlabki muzokaralar olib borilgan.
Muzokaralar natijalariga ko‘ra Commerzbank kredit ajratish uchun dastlabki shart sifatida zayomchi bo‘lib ishtirok etuvchi O‘zbekiston bankining kapitallashuvi kamida 80—85 million yevroni tashkil qilishi kerakligini belgilagan.
Bugungi kunda DSEC O‘zbekistonda “Shakar xolding” MChJ bilan faol ish olib bormoqda. Imzolangan kelishuv doirasida Toshkent viloyati hududida DSEC texnologiyalari bo‘yicha shakar ishlab chiqarishni yo‘lga qo‘yish loyihasi amalga oshirilmoqda.
Loyihaning qiymati 110 million yevroni tashkil qiladi. Undan 25 million dollari O‘zbekiston tomonidan, qolgan mablag‘ esa sarmoyachilar tomonidan ajratiladi.
Izoh (0)