Chirchiq oliy tank qo‘mondonlik-muhandislik bilim yurtida xalqaro toifadagi grossmeyster Nodirbek Abdusattorov hamda xalqaro toifadagi sport ustasi Shamsiddin Vohidov ishtirokida shaxmat bo‘yicha master-klass darsi bo‘lib o‘tdi. Bu haqda Mudofaa vazirligi matbuot xizmati “Daryo”ga ma’lum qildi.
Bilim yurti harbiy xizmatchilari va ularning farzandlari, kursant va askarlar ishtirok etgan uchrashuv davomida chempionlar bilan bo‘lgan suhbat barchada iliq taassurot qoldirish bilan bir qatorda, yig‘ilganlarning shaxmatga bo‘lgan qiziqishlarini yanada oshirdi. Tadbir davomida jahon chempionlari bilan musobaqa tashkil etilib, Nodirbek Abdusattorov va Shamsiddin Voxidov bir vaqtning o‘zida harbiy xizmatchilar, kursantlar va bolalar tarkibidan iborat 10 nafar raqib bilan tezkor shaxmat musobaqasida bellashdi.
Uchrashuv so‘nggida shaxmat bo‘yicha O‘zbekiston erkaklar terma jamoasining bosh murabbiyi Saidali Yo‘ldoshev hamda yosh grossmeysterlar bilim yurti boshlig‘i nomidan tashakkurnoma hamda esdalik sovg‘alari bilan taqdirlandi. Shuningdek, mehmonlar bilim yurtining “Faxriy mehmonlar” kitobiga o‘z dasxatini qoldirdi.
Xalqaro toifadagi grossmeyster Nodirbek Abdusattorov 2018-yilning dekabr oyida Turkiyaning Konya shahrida o‘smirlar o‘rtasida o‘tkazilgan Jahon shaxmat olimpiadasida oltin medalga sazovor bo‘lgan. Dunyo bo‘yicha eng yosh xalqaro toifadagi grossmeysterlardan biri hisoblanadi.
Shamsiddin Vohidov esa o‘tgan yili Rossiyaning Sankt-Peterburg shahrida shaxmat bo‘yicha erkaklar va ayollar o‘rtasida rapid hamda blits yo‘nalishi bo‘yicha o‘tkazilgan jahon chempionatida amaldagi jahon chempioni norvegiyalik xalqaro grossmeyster Magnus Karlsenni mag‘lubiyatga uchratgandi.
Izoh (0)