Saudiya Arabistonida o‘nlab “tashlandiq” biznes samolyotlari borligi aniqlandi
Saudiya Arabistonida qiymati yuz millionlab dollar turadigan hamda alohida shaxslarga yoki charter kompaniyalarga tegishli bo‘lgan o‘nlab samolyotlar aeroportlarda turgani va parvoz qilmayotgani ma’lum bo‘ldi. Bu haqda Reuters agentligiga tayanib, “Vedomosti” xabar berdi.
Agentlikning yozishicha, bu holat Saudiya Arabistonining merosxo‘r shahzodasi Muhammad ibn Salmon tomonidan o‘tkazilgan antikorrupsion kampaniya mamlakatning elita qatlamini qo‘rqitib qo‘yganini ko‘rsatmoqda.
Samolyotlarning bir qismi ularning sobiq egalari tomonidan ularga nisbatan ayb e’lon qilinmasligi uchun davlatga topshirilgan. Boshqalari esa mamlakatdan chiqib ketishi taqiqlangan saudiyaliklarga yoki hukumatning e’tiborini tortmaslik uchun o‘z boyligini ko‘rsatishdan qo‘rqayotgan kishilarga tegishli.
Qayd etilishicha, bu holat sababli mamlakatda taxminan 70 ta Bombardier va Gulfstream biznes samolyoti uchmayapti. Bundan tashqari ularning ichida yirik Airbus va Boeing samolyotlari ham mavjud. Mamlakatda 2018-yilning yakuniga ko‘ra jami 129 ta shaxsiy samolyot bor.
