4-yanvarning asosiy yangiliklari — “Daryo” dayjestida.
Jizzaxda oilali erkakka nisbatan tovlamachilik qilgan qiz 1,5 yilga qamaldi.
Jizzax shahrida yashovchi (sudlanuvchi va jabrlanuvchining ismi o‘zgartirilgan) Ch.Fayozov 2017-yilning dekabr oyida shahar hududida o‘ziga tegishli bo‘lgan Lacetti rusumli avtomashinasida kirakashlik qilib yurgan vaqti Ye.Markova bilan tanishib qoladi.
Ch.Fayozov Ye.Markova bilan yaqin munosabatda bo‘lib, u bilan tez-tez uchrashib turib, Ye.Markovaga ish topguniga qadar unga moddiy yordam berib keladi.
Ch.Fayozov 2018-yil 20-iyul kuni Ye.Markovaga oilasi va farzandlari borligini, oilasi buzilib, bolalari yetim bo‘lib qolishini xohlamasligini, tinch yo‘l bilan aloqani uzishlikni aytganida, Ye.Markova unga jahl qilib, “mahallangga boraman, qo‘ni-qo‘shnilaring oldida sharmanda qilaman” deb qo‘rqitadi. Ch.Fayozov undan tinch ajrashib ketish uchun nima qilishi kerakligini so‘raganida, u 1 000 000 so‘m pul berishni talab qiladi.
Ye.Markova 1 000 000 so‘m pullarni Ch.Fayozovdan tovlamachilik yo‘li bilan olgan vaqtida IIB xodimlari Ye.Markovadan 1 000 000 so‘m pullarni ashyoviy dalil tariqasida hujjatlashtirib olib, Ye.Markovaga nisbatan O‘zbekiston Respublikasi Jinoyat kodeksi 165-moddasining (tovlamachilik) 1-qismi bilan jinoyat ishi qo‘zg‘atildi.
***
Samarqandda fermerning ukalari xo‘jalikda ishlagan ayolni kaltaklab, buni videoga oldi.
Jabrlanuvchining aytishicha, 26-oktabr kuni soat 4:00 da eri bilan hosilning bir qismini olayotganida fermerning ukalarini uchratgan. Ular ayolni haqoratlagan va qo‘llarini bog‘lab, tan jarohatlari yetkazgan. Jarayon videoga olingan, keyinchalik diskka yozilib, sharmanda qilish bilan po‘pisa qilingan holda ayolga berilgan. F.U. prokuraturaga murojaatiga mazkur diskni ham ilova qilgan. Unda ayol haqoratlanib, unga nisbatan jismoniy kuch ishlatilgani aks etgan.
***
Farg‘ona viloyatining Oltiariq tumanida, Kichik Farg‘ona kanali bo‘yida yangi tug‘ilgan chaqaloqning jasadi topildi.
Bosh prokuratura matbuot xizmati xabar berishicha, murda suvdan chiqarib olinib, viloyat sud-tibbiy ekspertiza byurosi eksperti ishtirokida ko‘zdan kechirilganda, murdaning ayol jinsiga mansubligi va unda tan jarohatlari (bo‘g‘ish, tashqi ta’sir natijasida o‘ldirish kabi belgilar) mavjud emasligi, shuningdek kindigi 3 sm.ni tashkil qilib, tibbiyotga xos bo‘lmagan usulda kesilgan va bog‘lanmaganligi aniqlangan.
Viloyat sud-tibbiy ekspertiza byurosining 2019-yil 2-yanvardagi dastlabki ma’lumotnomasiga ko‘ra, chaqaloq murdasi suvda taxminan 10 kun qolib ketganligi, ichki tana a’zolari tekshirilganda, uning oshqozonida sut qoldig‘i topilmagan, murdaning o‘lim sababi, tug‘ilganidan so‘ng yashaganligi, suvga tirik yoki o‘lgan holatda tushganligi kabi holatlar sud-gistologiya tekshiruvi natijasiga ko‘ra aniqlanishi qayd etilgan.
***
Markaziy Osiyo davlatlarining xavfsizlikni ta’minlash va mintaqaviy muammolarni bartaraf etishdagi o‘zaro munosabatlarida ishonch darajasi oshiriladi. Bu haqda 2017–2021-yillarda O‘zbekiston Respublikasini rivojlantirishning beshta ustuvor yo‘nalishi bo‘yicha Harakatlar strategiyasini “Faol investitsiyalar va ijtimoiy rivojlanish yili”da amalga oshirishga oid Davlat dasturi loyihasida aytilgan.
Bajarish muddati — 2019-yil 20-iyul, ijro uchun mas’ullar — TIV, DXX, Strategik va mintaqalararo tadqiqotlar instituti.
***
O‘zbekistonning eng yosh kimyogari yangi elementga Shavkat Mirziyoyev nomini bermoqchi.
— Eng buyuk orzuim xalqaro Nobel mukofotini qo‘lga kiritish va muhtaram yurtboshimiz Shavkat Mirziyov nomiga yangi kimyoviy element yaratmoqchiman. Bu yangi element SHM shaklida bo‘ladi. Chunki kimyoviy elementlarni nomlanishida ma’lum bir an’ana mavjud, ya’ni element formulasi uchun birinchi yoki ikkinchi harflar olinadi. Bundan tashqari elementga nom berish huquqi muallifda bo‘ladi. Shu huquqimdan foydalanmoqchiman, — dedi kimyo fani bilimdoni 7 yoshli Zafarjon.
Izoh (0)