AQSh harbiylari Suriyani tark eta boshladi

Amerikalik harbiy xizmatchilar Suriyani tark etmoqda. Bu haqda “Zakon.kz” xabar berdi.

AQSh davlat kotibi Maykl Pompeoning qayd etishicha, AQSh Islom davlatiga qarshi kampaniyani davom ettiradi va Yaqin Sharqda barqarorlikni ta’minlashga bor kuchini safarbar qiladi.

Jurnalistning Amerika harbiylarining Suriyani tark etish muddati haqidagi savoliga Pompeo, aniq muddatlar haqida hech qanday ma’lumot bera olmasligini, “dushmanlar Suriyani qachon tark etishishimizni bilishini istamayman”, — deya javob berdi.

Shu bilan birga davlat kotibi AQSh Eronga qarshi kampaniyani davom ettirishini qayd etdi. “Biz bu borada natijalarga erishishda davom etamiz. Faqat bu ishlar bilan Amerika harbiylari Suriyani tark etganidan so‘ng shug‘ullanamiz”, — deydi u.

Davlat kotibi shuningdek Suriyadagi diniy ozchilik xavfsizligini ta’minlash hamda turk va qurd kuchlari orasida nizolarni oldini olish muhimligini qayd etdi. “Ushbu vazifalar hali hamon Amerika missiyasining bir qismi sanaladi”, — deydi Davlat departamenti rahbari.

2-yanvar kuni jurnalistlar bilan uchrashuv chog‘ida Tramp ham Suriyadan Amerika harbiylarining chiqib ketish muddatini aniq aytmadi.

Tramp Suriyadan Amerika harbiylarining olib chiqilishi haqida 19-dekabr kuni e’lon qildi. U mazkur harakatni Suriyada ID ustidan g‘alaba qozonilgani bilan asosladi.

The New York Times nashri Oq uy ma’muriyatidagi manbalarga asoslangan holda Amerika harbiylarining Suriya hududidan chiqishiga to‘rt oy ajratilganini ma’lum qilgan.