O‘zbekiston Prezidenti Shavkat Mirziyoyev Turkiyaning Tursomoney moliyaviy-iqtisodiy jurnalining yillik reytingida “Yilning xorijiy davlat arbobi” deb topildi. Bu haqda Istanbulda hukumat, parlament, jamoatchilik va ishbilarmon doiralar vakillari ishtirokida o‘tkazilgan tantanali marosimda e’lon qilindi, deya xabar beradi UzDaily.
Tadbirda qayd etilishicha, O‘zbekiston rahbarining tashqi dunyo, xususan, Turkiya va Markaziy Osiyo davlatlari bilan siyosiy-iqtisodiy aloqalar va o‘zaro hamkorlik mustahkamlanishiga qo‘shgan salmoqli hissasi e’tirof etildi.
Mazkur reyting ikki asosiy (“Yilning xorijiy davlat arbobi” va “Turkiyaning atoqli davlat arbobi”) nominatsiya va 6 ta yo‘nalish bo‘yicha belgilanadi. Kollegial komissiya va jyuri qarori Turkiya hamda chet el siyosatchilari, biznes vakillari faoliyatini o‘rganish va tahlil qilish asosida qabul qilinadi. Jyuri tarkibiga jurnal ekspertlari, Turkiya hukumati va parlamenti a’zolari, mamlakat mintaqalari vakillari kiradi.
Ma’lumot uchun, Turkiyaning sobiq bosh vaziri, hozirda parlament spikeri Binoli Yildirim reytingdagi ikkinchi asosiy nominatsiya g‘olibi bo‘ldi.
Izoh (0)