Rossiyada “GTA to‘dasi”ning omon qolgan o‘zbekistonlik a’zosi o‘z aybiga iqror bo‘lmadi
Moskva viloyat sudidan qochishga uringan “GTA to‘dasi” a’zolarining yagona omon qolgani — o‘zbekistonlik Hazratxon Dadaxonov konvoy (“kuzatib boruvchi soqchilar otryadi)ga hujum qilganlik haqidagi ish bo‘yicha o‘z aybiga iqror bo‘lmadi, deb xabar beradi “Gazeta.ru”.
Ta’kidlanishicha, Dadaxonov “GTA to‘dasi”ning boshqa a’zolari bilan birga o‘tgan yil yozida Moskva viloyat sudi binosidan qochishga uringan. U qurol o‘g‘rilashda, hibsdan qochishda, shuningdek, politsiyachining hayotiga suiqasd qilishda ayblanmoqda.
“Men o‘z aybimni to‘liq hajmda tan olmayman”, — dedi Dadaxonov tarjimon orqali.
Avgustda Rossiyaning Moskva viloyati sudi “GTA to‘dasi”ning to‘rt nafar a’zosi — Hazratxon Dadaxonov, Sherjon Qodirov, Anvar Ulug‘murodov va Umar Hasanovni umrbod qamoq jazosiga hukm qilgani xabar berilgan edi.
Jinoiy guruh Qirg‘iziston, O‘zbekiston va Tojikiston fuqarolaridan iborat kamida 15 kishini o‘z ichiga olgani ma’lum qilingan. Guruhga Grand Theft Auto kompyuter o‘yinlarining nomi berilgan.
Avvalroq, “GTA to‘dasi” a’zolari O‘zbekistonda harbiy to‘ntarishni rejalashtirgani xabar qilingan edi.
