O‘zbekiston va Qirg‘iziston 25-dekabr kuni “Oq-Tosh (Qirg‘iziston) — “Birlashgan” (O‘zbekiston) o‘tkazish punkti ishini qayta tikladi. Bu haqda “Podrobno.uz” xabar berdi.
Punkt Qirg‘izistonning Barak eksklavi aholisini mamlakatning asosiy hududiga to‘siqsiz o‘tishiga xizmat qiladi.
Bu haqdagi kelishuvga 18-dekabrda Qirg‘iziston bosh vaziri Mahammadkaliy Abilgaziyev va O‘zbekiston bosh vaziri Abdulla Aripov o‘rtasidagi muzokaralar chog‘ida erishilgan. Muzokaralar ikki mamlakat chegaradosh viloyatlari rahbarlari Kengashining ikkinchi yig‘ilishida bo‘lib o‘tgan.
“Oq-Tosh” o‘tkazish punkti davlat chegarasining Qirg‘iziston—O‘zbekiston qismida joylashgan va Barak eksklavini O‘sh viloyatining Qora-Suv tumani bilan bog‘lab turadi. Mazkur punkt Barak qishlog‘i aholisini o‘tkazishni 2013-yilning bahorida vaqtincha to‘xtatgan edi.
Qirg‘iziston davlat chegara xizmati O‘zbekiston tomoni bilan kelishuv asosida 2013—2015-yillarda qishloqqa oziq-ovqat mahsulotlari, dori vositalari, yoqilg‘i-moylash materiallari, urug‘, o‘g‘it va boshqa mahsulotlarni tashishni davom ettirgan.
Avval Barak eksklavi aholisi Qirg‘izistonning asosiy hududiga o‘tish uchun 150 kilometr masofani bosib o‘tib, “Qizil-Qiya avtoyo‘l” nazorat-o‘tkazish punktiga borishi kerak bo‘lgan. O‘sh shahriga yetib borish uchun esa 300 kilometr masofani bosib o‘tish talab qilingan. Endi esa “Oq-Tosh” punkti orqali mamlakatning asosiy hududiga o‘tish uchun bir kilometrdan sal ko‘proq masofani bosib o‘tish kerak bo‘ladi.
O‘tkazish punktlari har kuni soat 09:00 dan 19:00 gacha ishlaydi. Favqulodda vaziyatlarda aholini o‘tkazish sutka davomida uzluksiz amalga oshiriladi.
Izoh (0)