Oliy Majlis Senati a’zosi O‘ktamboy Qurbonovning senatorlik vakolati muddatidan ilgari tugatildi. Bu haqda Turon 24 xabar berdi.
MSKning ushbu qarori Qurbonov Xorazm viloyati hokimining qishloq va suv xo‘jaligi masalalari bo‘yicha o‘rinbosari lavozimiga tayinlangani munosabati bilan va bergan arizasiga muvofiq qabul qilingan.
Xorazm viloyati davlat hokimiyati vakillik organlari deputatlarining bo‘shab qolgan o‘ringa Senat a’zosi saylovi bo‘yicha qo‘shma majlisi 2018-yil 26-dekabr kuni soat 14:30 da Xorazm viloyati Ma’naviyat va ma’rifat markazining majlislar zalida bo‘lib o‘tadi.
O‘zbekiston prezidenti Shavkat Mirziyoyevning 29—30-noyabr kunlari Xorazm viloyatiga tashrifidan so‘ng 1-dekabr kuni viloyatning 5 ta tumanida hokimlar almashgani xabar qilingan edi.
Hazorasp tumani hokimi lavozimida ishlagan O‘ktamboy Qurbonov Xorazm viloyati hokimining qishloq va suv xo‘jaligi masalalari bo‘yicha o‘rinbosari O‘ktam Masharipovning o‘rniga tayinlangan. Masharipov esa Yangibozor tumani hokimi vazifasini bajaruvchi bo‘lgan.
Hazorasp tumani hokimi vazifasini bajaruvchi etib Ravshan Jabborov tayinlangan. U oldin Xorazm viloyati kasaba uyushma tashkilotlari birlashmasi raisi bo‘lib ishlagan.
Prezidentning Xorazmga tashrifidan so‘ng viloyat soliq boshqarmasi boshlig‘i Qudratbek Egambergenov Xorazm viloyati hokimining iqtisodiy va tadbirkorlik masalalari bo‘yicha birinchi o‘rinbosari bo‘lgan edi. Soliq boshqarmasiga esa Hurmat Abdukarimov rahbar etib tayinlangan edi.
Izoh (0)