Toshkentda o‘tkazilayotgan O‘zbekiston—Saudiya Arabistoni biznes forumida Taif Savdo-sanoat palatasi mas’ul vakili Abdulazim Turkistoniy ikki mamlakat o‘rtasidagi o‘zaro savdo ayirboshlash hajmini tanqidiy baholadi. Bu haqda O‘zA xabar bermoqda.
– Mamlakatlarimiz o‘rtasidagi savdo aylanmasi hajmi qoniqarli emas, – dedi Abdulazim Turkistoniy. – Statistik tahlilga ko‘ra, o‘tgan 20 yil ichida savdo aloqalarining hajmi 2,5 baravarga o‘sgan xolos. Vaholanki O‘zbekiston va Saudiya Arabistoni ham o‘z mintaqasida iqtisodiy salohiyati yuqori bo‘lgan yetakchi mamlakatlardir.
Ma’lumot o‘rnida, 2018-yilning o‘tgan 9 oyida O‘zbekiston va Saudiya Arabistoni o‘rtasidagi tovar aylanmasi 42 million AQSh dollarini tashkil etgan.
Ayni vaqtda biznes forumda Xorazm viloyati hokimi o‘rinbosari Shavkat To‘laganov o‘z taqdimoti orqali Saudiya Arabistoni ishbilarmon doiralari vakillarini vohaning investitsiyaviy, turizm va eksport salohiyati, erkin iqtisodiy va kichik sanoat zonalari bilan tanishtirmoqda.