Islom Karimov nomidagi fond yangi loyihasi haqida ijtimoiy tarmoqlardagi sahifalari orqali ma’lumot berdi.
“Ibodatxona qalb allegoriyasi sifatida, Amazonka siymosi himoyachi ona va erkinlik ramzi, tasavvuf an’analaridan namunalar, syurrealistik syujetlar – taniqli o‘zbek rassomi Bobur Ismoilovning yangi ijodiy asarlarini o‘z ko‘zingiz bilan ko‘rgan afzal.Karimov Fondi yangi ko‘rgazma loyihasi – Bobur Ismoilov ijodiga bag‘ishlangan “Narrativlar” nomli ko‘rgazmani taqdim etadi. Tasviriy san’at shinavandalari 10–30-dekabr kunlari Toshkent fotosuratlar uyida rassom ijodi bilan tanishishlari mumkin. Ko‘rgazmada Bobur Ismoilov tomonidan yaratilgan 50dan oshiq asarlar namoyish etilmoqda.O‘zbekiston zamonaviy tasviriy san’atining yorqin namoyandalaridan biri bo‘lmish Bobur Ismoilov inson qalb dunyosining qirralarini ochib beruvchi falsafiy asarlarni yaratgan musavvirdir.Uning har bir asarini spektakl sahnasi yohud oq-qora kino lavhasiga qiyoslash mumkin. Badiiy tasvirlarning aynan hikoya uslubiga mansubligi ko‘rgazma mavzusini belgilab berdi. ‘Narrativ’ so‘zi (lotincha narrare – so‘zlab berish, hikoya qilish) adabiy termin bo‘lib, so‘z yordamida ifoda etish ma’nosini anglatadi. Tasviriy san’atda narrativ so‘zi vizual obrazlar yordamida hikoya qilish demakdir.Ko‘rgazmada namoyish etilgan “narrativlar”ning ifodali hikoyalari muayyan syujet bilan emas, balki yagona uslub bilan o‘zaro bog‘liq. Ularni oq-qora uslubda ishlanganligi, detallar va kompozitsiyalarning mo‘l emasligi birlashtiradi. Bu esa, o‘z navbatida, e’tiborni asardagi asosiy detalga qaratib, aniq va ifodali jihatlarni ilg‘ay olish imkonini beradi”, — deyiladi xabarda.Bobur Ismoilov ijodiga bag‘ishlangan ko‘rgazmalar AQSh, Buyuk Britaniya, Rossiya va Fransiyada o‘tkazilgan.
O‘zbek zamonaviy tasviriy san’at maktabini taraqqiy ettirish maqsadida Karimov Fondi o‘zbek san’at ustalari tomonidan yaratilgan asarlar ko‘rgazmalarini O‘zbekiston va chet davlatlarida tashkil etishni o‘z vazifalaridan biri qilib belgilagan.