Tahlilchilar: 2019-yilda Apple Tesla’ni sotib oladi, Quyoshdagi chaqnash esa sun’iy yo‘ldoshlarni “o‘chirib qo‘yadi”

Saxo Bank tahlilchilari 2019-yil uchun o‘zlarining prognozlarini ma’lum qildi, deb yozmoqda Hi-Tech Mail.Ru.

Germaniyadagi iqtisodiy muammolar va yagona transport solig‘ining joriy qilinishi bilan birga, tahlilchilar bugungi dunyodagi vaziyatni o‘zgartirib yuborishi mumkin bo‘lgan bir nechta ehtimoliy hodisalarni prognoz qilmoqda.

Tahlilchilarning fikriga ko‘ra, Quyoshning 25-sikli Yer uchun navbatdagi muammolarni yuzaga keltiradi. Bunday muammolar avvalgi 24 ta siklga xos emas. Barchasiga texnik taraqqiyot va elektr qurilmalarning elektromagnit bo‘ronlariga zaifligi aybdor bo‘ladi. Kuchli Quyosh bo‘ronlari butun g‘arbiy yarimsharni qoplab oladi va ko‘plab sun’iy yo‘ldoshlarni “uzib qo‘yadi”. Bu GPS, internet, shuningdek, sun’iy yo‘ldoshga bog‘langan boshqa barcha tizimlardagi muammolarda o‘z aksini topadi.

Prognozlardan yana biri Apple kompaniyasiga taalluqli. Tahlilchilarga ko‘ra, kompaniya foydalanuvchilarning hamyonlarini bo‘shatish uchun keyingi mantiqiy qadam o‘ta yuqori texnologiyali avtomobil ekanligini tushunadi. Yangi loyiha ishlab chiqqandan ko‘ra tayyorini sotib olish osonroq hisoblanadi. Bunda Tesla moliyalashtirishga o‘ta muhtoj. Boshqa tomondan, keyingi yilda Tesla’ning barcha avtomobillari o‘z logotipini “olma”ga almashtirishini tasavvur qilish juda qiyin.