30-noyabr kuni “O‘zekspomarkaz” pavilyonida Axborot texnologiyalari va kommunikatsiyalarini rivojlantirish vazirligi va “O‘zbektelekom” AK tomonidan tashkil etilgan “O‘zbekiston Respublikasi Prezidenti topshirig‘i bo‘yicha AKT sohasida topshiriqlarni amalga oshirish ketma-ketligi” hisobot anjumani bo‘lib o‘tdi. Bu haqda “Daryo” muxbiri Sevara Nishonova xabar berdi.
Matbuot anjumanida ta’kidlanishicha, 2018-yil 1-dekabrdan boshlab “O‘zbektelekom” yangi kafolatlangan cheksiz tarif rejalarini taqdim etadi.
O‘zbekistonda birinchi marta 2 Mbit/s tezlikka ega kafolatlangan cheksiz internet narxi oyiga 88 ming so‘mni tashkil etadi.
Bu oldingi shunday tarif rejasidan 2 martadan ko‘proq qiymatda arzonroq ekani aytilmoqda.
Bundan tashqari, endi tarif rejalarida “gacha“ qo‘shimchasi mavjud bo‘lmaydi. Bu tanlab olingan tezlikning kafolatlanishini anglatadi. Endi 1 Mbit/s tarif aynan 1 Mbit/s barqaror tezlikka teng bo‘ladi.
“Faol tadbirkorlik, innovatsion g‘oyalar va texnologiyalar yili”da “O‘zbektelekom” ham kichik va o‘rta biznes subyektlarini qo‘llab-quvvatlaydi. 1-dekabrdan kompaniya abonentlarga “Teznet Business” va “Tadbirkor” yangi tarif rejalari seriyalarini taqdim etadi.
Shuningdek, 2019-yildan boshlab “O‘zbektelekom” AK ADSL tarmog‘ini rivojlantirishni to‘xtatadi va FTTx texnologiyasi bo‘yicha Tarmoqni rivojlantirish uchun barcha kuchlarni yo‘naltiradi. Kompaniya rejalarida abonentlarni FTTx texnologiyasi bo‘yicha bosqichma-bosqich ulash va har bir foydalanuvchiga yuqori sifatli internet xizmatlarini taqdim etish belgilangan.
Izoh (0)