Istiqbolli boshqaruv kadrlarini tanlab olish bo‘yicha “Taraqqiyot” respublika tanlovining nomzodlar tomonidan kelib tushgan anketalarini o‘rganib chiqib saralash bosqichi yakunlandi hamda joriy yilning 20-noyabr kuni rasmiy portal (taraqqiyot-tanlov.uz)da rasman e’lon qilindi.
Tanlov ishtirokchilariga qulay shart-sharoitlar yaratish maqsadida, onlayn test bosqichlari Qoraqalpog‘iston Respublikasi, Toshkent shahri va viloyatlar markazlarida joylashgan oliy ta’lim muassasalarida o‘tkaziladi. Har bir hudud bo‘yicha onlayn test bosqichlari o‘tkaziladigan oliy ta’lim muassasasi, manzili rasmiy portal (taraqqiyot-tanlov.uz)ning “Yangiliklar” menyusida joylashgan xaritada ko‘rsatilgan.
Tanlovni tashkil etish bo‘yicha qabul qilingan O‘zbekiston Respublikasi Prezidentining 2018-yil 30-maydagi PQ-3755-sonli qarorining 2-ilovasiga muvofiq, 1-tur onlayn test bosqichi joriy yilning 25—30-noyabr kunlari o‘tkazilishi ko‘zda tutilgan. Nomzodlar sonidan kelib chiqib, onlayn test jarayonlari 2 smenada (9:00-12:00, 13:00-16:00) o‘tkazilishi nazarda tutilgan. Shu munosabat bilan joriy yilning 23-noyabr kuni har bir nomzod “qachon, qaysi vaqtda, qayerda test topshirishi” bo‘yicha ma’lumot (ro‘yxat) rasmiy portal (taraqqiyot-tanlov.uz)ning “Yangiliklar” menyusida e’lon qilindi.
Nomzodlar o‘zlariga belgilangan vaqtda fuqarolik pasporti (yoki tegishli tashkilot tomonidan tasdiqlangan (imzo va muhr) ma’lumotnoma hamda pasport nusxasi) bilan kelishi so‘raladi.
Tanlovga belgilangan vaqtda xizmat safari yoki ma’lum sabablarga ko‘ra Respublikaning boshqa hududida bo‘lgan nomzodlar o‘zlariga yaqin bo‘lgan test o‘tkaziladigan oliy ta’lim muassasiga kelib, onlayn testlarni topshirishlari mumkin.
Eslatib o‘tamiz, 1-tur onlayn test bosqichida Aqliy salohiyat (IQ), Psixologik barqarorlik va horijiy tillar (ingliz, nemis, fransuz tillaridan ihtiyoriy bittasini) bo‘yicha test sinovlari bo‘lib o‘tadi.
Qo‘shimcha ma’lumot uchun, Call-centre faoliyat yuritmoqda : +99871 239 12 98; +99871 232 61 47
Izoh (0)