Qishloq xo‘jaligi vazirligida Yevropa investitsiya banki (YeIB) vitse-prezidenti Vasil Xudak boshchiligidagi delegatsiya bilan uchrashuv bo‘lib o‘tdi. Bu haqda vazirlik matbuot xizmati “Daryo” ga xabar berdi.
Qishloq xo‘jalik vaziri o‘rinbosari Abdimuxtor Ergashev agrar sohada so‘nggi paytlarda amalga oshirilayotgan keng ko‘lamli ishlar haqida batafsil ma’lumot berib, mazkur moliya muassasasi bilan qishloq xo‘jaligi mahsulotlarini ishlab chiqarish, qayta ishlash, saqlash va logistikasi, shuningdek, ekin maydonlariga suvni tejovchi texnologiyalarni joriy etish yo‘nalishlaridagi loyihalarni amalga oshirish ahamiyati haqida ta’kidladi.
“YeIBning O‘zbekistonda o‘z faoliyatini boshlaganiga endi bir yil to‘ldi. Ayni paytda iqlim o‘zgarishining salbiy oqibatlarini bartaraf etish, degradatsiyaga uchragan tuproqlarni qayta tiklash, suv infratuzilmasini modernizatsiya qilish, tejamkor hamda ekologik bezarar texnologiyalarni qo‘llash bo‘yicha loyihalarni amalga oshirmoqdamiz. Qishloq xo‘jaligi vazirligi takliflaridan kelib chiqqan holda bu sohadagi loyihalarni moliyalashtirishga tayyorligimizni ma’lum qilamiz”, — deya ta’kidladi Vasil Xudak.
Uchrashuv davomida bog‘dorchilik sohasida, ekin maydonlariga tomchilab sug‘orish texnologiyalari joriy etish borasidagi loyihalarni amalga oshirish, qishloq xo‘jaligi sohasi xodimlarini malakasi oshirishga kelishib olindi.
Izoh (0)