“Daryo” tahririyatiga Samarqand shahridagi Siyob dehqon bozorida savdo qiluvchi tadbirkor Elmurod Mardiyev murojat qilib, dehqon bozoridagi ayrim tartibsizliklar uning tadbirkorlik ishiga halal berayotganligini bayon qilgan. Mazkur masala yuzasidan “Daryo” muxbiri Farhod Norbo‘tayev jurnalistik surishtiruv o‘tkazdi.
“2015-yildan buyon Siyob dehqon bozorida tadbirkorlik faoliyatini yuritib, bozorda parranda mahsulotlari savdosi bilan shug‘ullanaman. Davlat tomonidan talab qilingan barcha to‘lovlarni o‘z vaqtida amalga oshiraman. Biroq, bozor hududiga kirish qismida turli xil butkachalarning tashkil etilishi, bozor ichida savdo qiluvchi men kabi tadbirkorlarning savdosiga ta’sir qilyapti”, — deydi Elmurod Mardiyev.
Siyob bozori hududiga kirish darvozasi oldida beshdan ortiq savdo butkachalari tashkil qilingan. Mazkur ko‘chma savdo do‘konlari O‘zbekiston Respublikasi Vazirlar Mahkamasining 2016-yil 13-iyuldagi “Ko‘chma savdoga ruxsat berish tartibi to‘g‘risidagi Nizomni tasdiqlash haqida”gi 233-sonli va Samarqand viloyat hokimining 2016-yil 16-iyuldagi 205-Q sonli hamda Samarqand shahar hokimining 2016-yil 21-iyuldagi 1048-Q sonli qaroriga muvofiq 2018-yilda ko‘chma savdo obyektlarini joylashish sxemasi tasdiqlangan.
O‘rganishlar davomida faqatgina yakka tartibdagi tadbirkor Ozod Sharofov va Bahodir Soriyevga Siyob bozori yonidan o‘tuvchi Al-Buxoriy ko‘chasidan Siyob bozori hududida ko‘chma savdo do‘konida savdo qilishga ruxsat berilgan. Qolgan tadbirkorlarning guvohnomalarida savdo qilish manzili ko‘rsatilmagan.
Mazkur masala yuzasida Siyob dehqon bozori rahbari Solijon O‘sarov bilan ham suhbatlashdik.
“Bozorning kirish qismida ko‘chma do‘konda savdo qilish uchun yakka tartibdagi tadbirkorlarga Samarqand shahar hokimining iqtisodiyot va tadbirkorlik masalalari bo‘yicha o‘rinbosari Talantjon Esirgapov imzo chekkan guvohnoma bor. Bu tadbirkorlarga bozorning kirish qismida savdo qilmaslikni aytsak, ular darrov hokimiyat bergan guohnomasini ko‘rsatishadi. Hokimiyat bozor oldida ko‘chma do‘konda savdo qilish uchun ruxsat bergan, biroq, Siyob bozori ma’muriyatida bu borada hech qanday hujjat yo‘q. Aniqrog‘i, bozorning kirish qismida ko‘chma do‘kon bo‘yicha bozor ma’muriyatining roziligi so‘ralmaydi. Tadbirkorlar hokimiyat bergan guvohnoma asosida o‘z butkalarini joylashtirib olgan. Biz ham bozor xududi tartibli bo‘lishini istaymiz. Ammo hokimiyat qaror chiqarganidan so‘ng biz hech qanday chora ko‘rolmaymiz. Biror bir chora ko‘rsa darrov tadbirkorlik faoliyatiga to‘sqinlik qilgan bo‘lamiz”, - deydi Solijon O‘sarov.
Ko‘chma do‘konda savdo qiluvchi xodimlar bilan suhbat jarayonida aniqlanishicha, yakka tartibagi tadbirkor sotuvchi sifatida odamlarni yollab savdo faoliyati bilan shug‘ullanilayotganligi aniqlandi. Biz ko‘chma savdo do‘koning birorta xodimini topa olmadik. Sotuvchilar hozir keladi, ish bilan chiqib ketgan degan gapdan nariga o‘tmadi. Amaldagi qonunlar bo‘yicha yakka tartibdagi tadbirkor savdo do‘konida faoliyatni o‘zi yuritish kerak emasmi? Agar ishchi xodim olib faoliyat yuritayotgan bo‘lsa tadbirkorlik faloliyati davlat ro‘yxatidan boshqa tartibda o‘tkazilishi kerak emasmi? Nahotki viloyat Davlat soliq boshqarmasi bunday holatlarga ko‘z yumayotgan bo‘lsa? Soliqni kamroq to‘lash maqsadida yakka tartibdagi tadbirkor sifatida ro‘yxatdan o‘tib, ishni istagancha yuritish mumkinmi?
Ko‘chma savdo do‘konlariga chiqarilgan guvohnomalardagi imzoning turli xil ekanligi ham e’tiborimizni tortdi. Buni guvohnomadagi imzolardan ham ko‘rishingiz mumkin.
Aslida ko‘chma savdo do‘konlari bozor xududidan uzoqda, aholi bozorga kelish imkoniyati kam bo‘lgan joylarga qo‘yilsa maqsadga muvofiq bo‘lmaydimi?
Qolaversa, bozor xududida tozalik va tartib bo‘lishini talab qilgan hokimlikning o‘zi hududga kirishda ko‘chma do‘konlarning faoliyatiga ruxsat berish orqali o‘z talabini o‘zi buzib chiqqan bo‘lmayaptimi?
“Tadbirkorlarning barchasi teng ko‘rilishi kerak. Kimlarningdir ko‘magida bozorning kirish qismida savdo qilish imkoniyatini yaratilishi boshqa tadbirkorlarning manfaatiga zid bo‘lishi kerak emas. Bizda ham zarur hujjatlar bor. Nega bizga bozorning kirish qismiga savdo qilishga ruxsat berishmayotganligiga tushunish qiyin”, — deydi Elmurod Mardiyev.
Biz mazkur holat yuzasidan Samarqand shahar hokimligining munosabatini kutib qolamiz.
Izoh (0)