Qashqadaryo viloyatining Koson tumanida MIB xodimlari, mahalla posboni va mahalla uchastka noziridan iborat ishchi guruhni uyga kiritishni istamay qarshilik ko‘rsatgan fuqaro ularni haqoratladi. Bundan foyda bo‘lmagach, bolta bilan ularni uydan quvib chiqarmoqchi bo‘ldi, hatto uchastka nozirining pogonini yulishgacha bordi. Bu haqda “Daryo”ga MIB matbuot xizmati ma’lum qildi.
Aniqlanishicha, Koson tumani “Araliq” mahallasida yashovchi Yunus Jalolov yashash uyining yordamchi xo‘jalik binosida yashirin ravishda qo‘lbola usulda tayyorlangan sex tashkil qilib, chigitdan yog‘ hamda kunjara mahsulotlar ishlab chiqarish faoliyati bilan shug‘ullanib kelayotganligi o‘tkazilgan tezkor tadbir davomida fosh etildi. 112 litr iste’molgayaroqsiz juvoz yog‘i va 13 turdagi jami 3.566.264 so‘mlik mahsulotlar tegishli tartibda rasmiylashtirib olindi.
Yunus Jalolov elektr tarmog‘iga o‘zboshimchalik bilan noqonuniy ravishda ulanib, 32 kun davomida davlat manfaatlariga 3.247.949 so‘mlik zarar yetkazgan.
Unga nisbatan jinoyat ishi qo‘zg‘atilib, hozirda tergov harakatlari olib borilmoqda.
Izoh (0)