Qashqadaryo viloyatining Kitob tumanida yashovchi 83 yoshli mehnat faxriysi, tarix fanlari nomzodi Muxtor bobo Shapsanov Mirzo Ulug‘bek nomidagi O‘zbekiston Milliy universitetining fizika fakulteti talabalari uchun Muxtor Shapsanov nomidagi stipendiya ta’sis etdi, deb xabar beradi Turon 24.
Stipendiya fakultet kengashi qaroriga asosan yuqori kurslarda tahsil oluvchi 2 nafar a’lochi talabaga beriladi.
Muxtor ota birinchi stipendiyalarni fizika fakultetining uchinchi va to‘rtinchi bosqichida tahsil oluvchi namanganlik va buxorolik talabalarga 30-oktabr kuni topshirgan.
“Stipendiya bundan keyin har oyning 8-sanasida topshiriladi. Nasib etsa, 6-dekabr kuni Toshkentga ketayapman. 8-dekabr – Konstitutsiya bayrami arafasida eng iqtidorli 2 nafar talabaga stipendiyani berib qaytaman”, — deydi Muxtor ota.
Muxtor Shapsanov nomidagi stipendiyaning miqdori 600 ming so‘mni tashkil qiladi.
Muxtor Shapsanov 1969-yildan sobiq Ittifoqning Hindistondagi elchixonasida faoliyat yuritgan. Bir necha marta mamlakat rahbarlari bilan Indira Gandi o‘rtasida tarjimonlik qilgan. Xizmat yuzasidan bir muddat Pokistonda yashagan. Malayziya, Yaponiya, Qatar, Polsha, Shri-Lanka, Germaniya, Birlashgan Arab Amirliklari singari davlatlarda bo‘lgan. Keyinchalik tarix fanlari nomzodi, dotsent sifatida ko‘p yillar ToshDU (hozirgi O‘zMU)da dars bergan.
Izoh (0)