Rossiya prezidenti Vladimir Putinning matbuot kotibi Dmitriy Peskov Yaponiya bilan “bir tomonlama bitim”ning va Kuril orollari “avtomatik ravishda topshirilishi”ning imkoni yo‘qligini ma’lum qildi, deb yozadi TJournal.
“O‘tgan kunlar ichida go‘yoki, orollarni berish haqida qandaydir bir tomonlama bitim borligi haqidagi mish-mishlarni va boshqa turli siyosiy fikrlarni eshitdik. Bunday emas. Bunday bo‘lishi ham mumkin emas”, — dedi Peskov “Rossiya 1” telekanali efirida.
Shu bilan birga, Peskov Kuril masalasida Rossiya va Yaponiya davlatlar manfaatlariga zid kelmaydigan murosaga erishishi zarurligini taxmin qildi.
“Albatta, shunday katta tajribaga ega bo‘la turib, Rossiya Yaponiyaning boshqa mamlakatlar, birinchi navbatda AQSh bilan ittifoqlik aloqalarini e’tibordan chetda qoldira olmaydi”, — dedi u.
Yaqinda Sindzo Abe va Vladimir Putin Singapurda uchrashgan edi. Kreml ular 1956-yilgi deklaratsiya asosida muzokaralarni faollashtirish haqida kelishib olganini ma’lum qildi. Ushbu hujjatda Moskva tinchlik haqida bitim imzolanganidan keyin yaxshi niyat belgisi sifatida Yaponiyaga Shikotan orolini va Kichik Kuril tizmalaridagi bir qator mayda orollarni berishga tayyorligini bildirgan edi.
Keyinroq Yaponiya bosh vaziri Sindzo Abe Janubiy Kuril orollarining bir qismi Yaponiya tomoniga berilgan taqdirda, u yerga AQSh harbiy bazalari joylashtirilmasligini ma’lum qildi.
Izoh (0)