O‘zbekiston kartoshka importini tashkil etuvchi mamlakatlar qatoriga kiradi. Har yili 12-15 ming tonna urug‘likni chetdan olib kirishga to‘g‘ri kelmoqda.
Respublika qishloq xo‘jaligi mahsulotlari yetishtirishga mos bo‘lishiga qaramay, hal etilishi lozim bo‘lgan muhim masalalar ko‘p.
Yevropa Ittifoqi tomonidan loyihalashtirilgan “O‘zbekiston qishloq joylarini barqaror rivojlantirish” dasturining ijrosi aynan shu kabi muammolarni bartaraf etishga qaratilgan. Loyiha doirasida joriy yilning fevral oyida Fransiyadan 7 navdagi 19,5 tonna kartoshka urug‘i olib kelindi va Andijon viloyatining to‘rtta fermer xo‘jaliklarida sinov tariqasida parvarishlandi. Dastlabki, natijalar kelgusi yilda bu boradagi ishlar ko‘lamini oshirishga xizmat qiladi.
Andijon viloyatining Oltinko‘l tumanida bo‘lib o‘tgan seminar yig‘ilishi aynan shu mavzuga bag‘ishlandi. Unda Fransiyaning Favqulodda va muxtor elchisi Violen de Villemore, Germaniya xalqaro hamkorlik jamiyati Markaziy Osiyo dasturlari hududiy rahbari Torsten Brekina, shuningdek, Italiya hamda Fransiya elchixonalari vakillari, Yevropa Ittifoqining O‘zbekistondagi vakolatxonasi va O‘zbekiston kartoshka yetishtiruvchilar assotsiatsiyasiga texnik yordam ko‘rsatish milliy byurosi vakillari ishtirok etdilar.
“Odatda har yili kartoshka urug‘ligi may va iyun oylarida import qilinar edi. Joriy yil bu faoliyat fevral oyida tashkil etilganligi bois ikki marta hosil olishga erishdik. Buloqboshi va Jalaquduq tumanlarida yetishtirilgan urug‘lik kartoshkalarning hosildorligi Fransiyadagi hosildorlikka nisbatan yuqori ekanligi mamlakatimizda ushbu ekin turini parvarishlashning istiqboli porloqligidan dalolatdir” - deydi“Innovatsion Agro Servis” kartoshkachilik kooperativi rahbari Murod Komilov.
Shu kuni 100 tonna hajmdagi urug‘lik kartoshkani saqlash uchun qurib bitkazilgan omborxonaning ochilish marosimi va kartoshka hosilini terib olishga ixtisoslashgan maxsus traktorni topshirish marosimi ham bo‘lib o‘tdi.
Mutaxassislarning fikricha, O‘zbekiston o‘zining tabiiy iqlimi, shart-sharoiti bilan kartoshkani import qiluvchi mamlakatlar qatoridan eksport faoliyatini olib boruvchi davlatlar qatoriga kirishi mumkin. Bu borada dastlabki qadamlar tashlandi.
Izoh (0)