Joriy yilning 9-noyabr kuni Shavkat Mirziyoyev raisligida o‘tkazilgan sog‘liqni saqlash tizimini rivojlantirish, hududlar aholisini sifatli tibbiy xizmat bilan qamrab olish, tibbiyot muassasalari moddiy-texnik bazasini mustahkamlash borasidagi islohotlar natijalarini tahlil qilish va istiqboldagi ustuvor vazifalarni belgilashga bag‘ishlangan videoselektor yig‘ilishida tizimda kutilgan natijalar ko‘rinmayotgani, ayniqsa, tumanlar, chekka qishloqlardagi aholi tibbiy xizmatdagi jiddiy va tub o‘zgarishlarni o‘z hayotida sezmayotgani alohida ta’kidlandi, deb yozadi O‘zA.
Joriy yilning o‘tgan davrida Prezidentning Virtual qabulxonasiga tibbiyot sohasiga doir 45 mingdan ziyod murojaat kelib tushgani bu sohada hali muammolar borligidan dalolat berayotgani qayd etildi.
Yig‘ilishda tibbiyot tizimidagi muammolarni vaqtida aniqlash va hal etish, buning uchun hududlardagi holatni to‘liq qayta o‘rganib chiqish, bunda qishloq vrachlik punktlari va oilaviy poliklinikalardan markaziy tibbiyot muassasalarigacha qamrab olish kerakligi ta’kidlandi.
Prezidentning O‘zbekistonda 2025-yilgacha sog‘liqni saqlash tizimini rivojlantirish bo‘yicha konsepsiya loyihasini ishlab chiqish yuzasidan bergan ko‘rsatmalari tibbiyot sohasini o‘rta va uzoq muddatli istiqbolda rivojlantirishning aniq yo‘nalishlarini belgilab olishda muhim ahamiyat kasb etadi.
Yig‘ilishda sohani moliyalashtirishning amaldagi smeta usuli eskirgani, tibbiyot muassasalari qancha bemor davolanganiga qarab emas, koyka-o‘rinlar soniga qarab moliyalashtirib kelinayotgani qayd etildi. Shundan kelib chiqib, bugungi zamon talablari va xorij tajribasi asosida, sinov tariqasida mamlakatning 14 hududida bittadan tibbiyot birlashmasini aholi jon boshiga va statsionar sharoitda davolanganlar soniga qarab moliyalashtirish bo‘yicha topshiriq berildi.
O‘zbekistonda 2021-yildan boshlab majburiy tibbiy sug‘urta tizimini bosqichma-bosqich joriy etish, Janubiy Koreya, Singapur, Germaniya kabi davlatlardan xalqaro ekspertlarni jalb qilgan holda, tegishli qonun va qonunosti hujjatlarini ishlab chiqish lozim bo‘ladi.
Qayd etilganidek, joriy yilda tibbiyot sohasiga davlat budjetidan 2017-yilga nisbatan 40 foiz ko‘p mablag‘ ajratildi. Kelasi yil sohaga qariyb 30 foiz ko‘p mablag‘ yo‘naltirish rejalashtirilmoqda.
Izoh (0)