Andijon viloyatining Paxtaobod tumanida fermer xo‘jaliklaridan birining rahbari umumta’lim maktabida o‘qituvchi bo‘lib ishlab kelgan turmush o‘rtog‘ini urib o‘ldirdi. Bu haqda “Xalq so‘zi” xabar bermoqda.

Ma’lum bo‘lishicha, mazkur oiladagi fojiaga o‘zaro kelishmovchilik, xususan, erning spirtli ichimlik ichishga moyilligi sabab bo‘lgan.

Ikki farzandning otasi bo‘lmish oila boshlig‘i hodisa yuz bergan kuni o‘z xonadonida spirtli ichimlik iste’mol qilmoqchi bo‘lgan. Bundan dili ranjigan ayol e’tiroz bildirgan va buning o‘rniga qishki mavsumga tayyorgarlik ko‘rishga chaqirgan. Ichkisi kelib turgan erkak esa xotinini aroq shishasi va temir parchasi bilan urib, tanasining turli qismlariga 72 ta jarohat yetkazgan.

Olingan tan jarohatlari oqibatida ayol voqea joyida hayotdan ko‘z yumgan. Ichkilikka ruju qo‘ygan oila boshlig‘i ayni paytda Paxtaobod tuman prokuraturasida ko‘rsatma bermoqda.