Tadbirkorlar va ishbilarmonlar harakati — O‘zbekiston Liberal-demokratik partiyasi Namangan viloyati kengashi tomonidan siyosiy partiya tashkil etilganining 15 yilligi munosabati bilan tantanali tadbir o‘tkazildi, deb yozadi O‘zA.
Tadbirda O‘zbekiston Respublikasi Oliy Majlisi Qonunchilik palatasi deputatlari, partiya faollari, hamkor tashkilot va muassasalar, ommaviy axborot vositalari vakillari ishtirok etdi.
Tadbirda qayd etilganidek, tadbirkorlik subyektlari safi kun sayin kengayib, ularning yalpi ichki mahsulotdagi ulushi ortib bormoqda. Bu borada partiya viloyat, shahar va tuman kengashlari tomonidan ishbilarmon tadbirkorlar safini kengaytirish maqsadida o‘tkazilayotgan turli ko‘rik-tanlovlar muhim ahamiyat kasb etmoqda. Tadbirkorlik faoliyatini yo‘lga qo‘yish borasida uchrayotgan turli to‘siq va muammolar o‘z o‘rnida bartaraf etib borilmoqda.
Jumladan, shu kunga qadar xalq deputatlari viloyat Kengashidagi partiya deputatlari tomonidan tashkilotlar rahbarlariga 148 ta, tuman va shahar kengashlari deputatlari tomonidan esa 425 ta deputatlik so‘rovi kiritilgan. Ushbu murojaatlarning aksariyati partiya elektorati bo‘lgan tadbirkor va fermerlar tomonidan yo‘llangani jamoatchilik orasida partiyaga bo‘lgan umid va ishonch oshib borayotganidan dalolat beradi.
Tantanali marosimda tuman va shahar kengashlari rahbar va ijroiya organlarining samarali faoliyatini ta’minlash, jamoatchilik orasida partiya maqsad va vazifalarini keng targ‘ib qilish, partiya faollari hamda tarafdorlari safini yanada kengaytirish maqsadida o‘tkazilgan “O‘zLiDeP yuksak maqsadlarga chorlaydi” ko‘rik-tanlovi g‘oliblari, “Eng namunali boshlang‘ich partiya tashkiloti”, “Xalq deputatlari mahalliy kengashlaridagi eng faol deputat” va “Eng namunali tuman(shahar) partiya tashkiloti” tanlovining 1-, 2- va 3-o‘rin sohiblariga partiya viloyat kengashining faxriy yorliq va esdalik sovg‘alari topshirildi.
Izoh (0)