O‘zbekiston veb-tahdidlar ko‘p uyishtiriladigan mamlakatlar ro‘yxatida 27-o‘rinni egalladi

O‘zbekistonda 2018-yilning o‘n oyi mobaynida 36,9 foiz internet foydalanuvchilari internetda kiber-hujumga uchragan, deb yozadi “Podrobno.uz”.

Ushbu ko‘rsatkich bo‘yicha mamlakat 27-o‘rinni egallaydi. Qattiq disklar, USB-fleshkalardagi viruslar orqali 69,8 foiz foydalanuvchilarga hujum uyushtirilgan. Bu esa dunyoda 13-o‘rin degani.

Qayd etish kerakki, bunday turdagi tahdidlar bevosita moliyaviy zarar keltirmaydi. Biroq kompyuterning ishlash tezligiga sezilarli darajada ta’sir ko‘rsatadi.

Umuman olganda, hozirgi kunda internet foydalanuvchilariga kiber-tahdidlar 2006-yil bilan solishtirganda 700 baravarga ortdi. Hujumlarning umumiy soni ham ortib bormoqda — 2017-yilda dunyo bo‘ylab milliarddan ortiq kiber-hujumlar qayd etilgan.

“Kasperskiy laboratoriyasi” ekspertlari kiberhujumlardan himoyalanish uchun quyidagi tavsiyalarni keltiradi:

Messenjerlar orqali xabarlarga ilova qilingan shubhali havolalarga kirmang!

Operatsion tizim va dasturlarni tez-tez yangilab turing;

Dasturlarni faqat rasmiy havolalardan yuklab oling;

Kompyuteringizga kirish uchun qiyin va murakkab parollardan foydalaning;

Qurilmadagi muhim ma’lumotlarni USB-fleshka yoki qattiq diskka ko‘chirib oling;

Dasturlarga keraksiz funksiyalarga kirish imkonini bermang, ishonchli himoya tizimini o‘rnating.