Meksika bilan chegaraga qo‘shinlarni joylashtirish AQShga 40 mln dollarga tushadi

AQSh prezidenti ma’muriyati tomonidan Meksika bilan chegaraga qo‘shinlarning joylashtirilishi AQSh budjetiga 42 dan 110 million dollargacha tushishi mumkin, deb yozadi “Interfaks”.

Strategik va budjet hisob-kitoblari markazi ma’lumotlariga ko‘ra, rasman “Sodiq vatanparvar” deb ataluvchi, Meksika bilan chegaraga qo‘shin joylashtirish operatsiyasi xarajatlari har bir harbiy xizmatchi boshiga kuniga 112—143 dollarga teng.

Shu bilan birga, operatsiyada harbiy samolyotlardan foydalanish kuniga qo‘shimcha 136—645 ming dollarga tushadi.

Hozir Pentagon janubiy chegaraga 7 ming harbiy xizmatchini yuborishga tayyorlanmoqda, ular u yerda 15-dekabrgacha bo‘lib turadi. Donald Tramp avvalroq Markaziy Amerikadan muhojirlar karvonini ushlab turish uchun 15 ming nafargacha harbiy xizmatchi yuborishga tayyorligini aytgandi.

Pirovardida missiya 42 million dollarga tushishi mumkin. 15 ming askarning barchasini joylashtirish esa 110 million dollar xarajat demakdir.