O‘zbekiston Respublikasi Tashqi ishlar vaziri Abdulaziz Komilov Instagram’dagi sahifasida yana tarixiy suratlar bilan bo‘lishdi.
Bu safar vazirning sahifasidan uning shaxsiy arxividan olingan, 1994 hamda 1997-yillarda Falastin muxolifatining sobiq rahbari Yosir Arofat bilan birga tushgan suratlari joy oldi.
“O‘mon Isroil Davlatini tan olmoqda. Mustaqil Falastin davlatini barpo etish masalasi dolzarblashmoqda. Terrorizmda ayblanishdan tinchlik bo‘yicha Nobel mukofoti laureatigacha yo‘lni bosib o‘tgan Yosir Arofat buni tasavvur qila olganmidi? Toshkent, 1994-yil sentabr oyi. Rammaloh, 1997-yil aprel oyi. Shaxsiy arxivdan”, — deya izoh yozdi vazir.
Eslatib o‘tamiz, avvalroq O‘zbekiston Tashqi ishlar vaziri Abdulaziz Komilov Instagram’dagi sahifasiga afg‘onistonlik muxolifatchi siyosatchi Gulbiddin Hikmatyor bilan 2018-yil iyulida Kobulda bo‘lib o‘tgan uchrashuvi suratini joylagan, shuningdek, “Tolibon” tashqi ishlar vaziri Mulla Mutavakil bilan tushgan, shaxsiy arxivdagi surati bilan ham bo‘lishgan edi.
Keyinroq “Afg‘oniston ozodligi Islom ittifoqi” fraksiyasi rahbari Ustod Abdul Rasul Sayyaf bilan tushgan suratini joylashtirdi. Bundan tashqari, 1995-yilda Afg‘onistonning Kobul shahrida “Panjsher sheri” Ahmad Shoh Masud bilan tushgan surati bilan ham bo‘lishdi.
Izoh (0)