Samarqand shahrida so‘nggi ikki kun davomida kuchli yomg‘ir yog‘ishi oqibatida yuzaga kelgan suv toshqini bartaraf etildi. Samarqand shahar hokimligi va obodonlashtirish boshqarmasi tomonidan shahardagi 20 ta ko‘chada 300 nafardan ortiq obodonlashtirish xodimlari ariqlar va suv to‘planib qolgan joylarni tozalash ishlarini olib bordi. Bu haqda “Daryo” muxbiri Farhod Norbo‘tayev xabar berdi.

“Yomg‘ir natijasida suv to‘planib qolgan Samarqand shahridagi ‘O‘zbekiston’, ‘Spitamen’, ‘Narpay’, ‘Firdavsiy’, ‘Mirzo Ulug‘bek’ va ‘Mahmud Koshg‘ariy’, ‘’So‘zangaron’, ‘Istiqbol’, ‘Zarafshon’, ‘Shahrobod’ va ‘Fidokorlar’ kabi mahallalaridagi 20 ta ko‘chalardagi ariqlar to‘liq tozzalandi”, — dedi Samarqand shahar hokimligi kommunal masalalari bo‘yicha rahbari Feruz Najmiddinov.

Samarqand shahar hokimligi tomonidan yog‘ingarchilik natijasida ariqlarga to‘planib qolgan suvlarni bartaraf etish bo‘yicha murojaat qilgan fuqarolarga amaliy yordam ko‘rsatilib, yuzaga kelishi mumkin bo‘lgan ko‘plab holatlarning oldi olindi.