31-oktabr kuni O‘zbekiston bosh vaziri Abdulla Aripov raisligida o‘tkazilgan yig‘ilishda O‘zbekiston bosh prokurori Otabek Murodovga yangi vazifa topshirilgan. Bu haqda “Kun.uz” xabar bermoqda.
Xabar qilinishicha, Prezident adminstratsiyasi rahbari Zaynilobiddin Nizomiddinov prezident topshirig‘iga ko‘ra, bosh prokurorga O‘zbekiston hukumatida yangi vazifa topshirilganini ma’lum qilgan.
Endilikda Otabek Murodov bosh prokuror bo‘lish bilan birga, O‘zbekiston bosh vazirining o‘rinbosari — Qishloq va suv xo‘jaligi, qishloq xo‘jaligi va oziq-ovqat mahsulotlarini qayta ishlash masalalari kompleksining rahbari vazifasini bajaruvchi bo‘ladi.
Eslatib o‘tamiz, 29-oktabr kuni O‘zbekiston bosh vaziri o‘rinbosari Zoyir Mirzayev shov-shuvli ravishda ishdan bo‘shatilgandi. Murodov aynan Mirzayevning kompleksiga javob beradi.
Ma’lumot uchun, Otabek Murodov 1975-yili Qashqadaryo viloyatida tug‘ilgan. Toshkent davlat yuridik institutini tamomlagan. Bosh prokuraturaning jinoyatlarni tergov qilish boshqarmasi alohida muhim ishlar bo‘yicha tergovchisi, Adliya vazirining o‘rinbosari bo‘lib ishlagan.
U 2002-yili Prezident farmoniga ko‘ra “Jasorat” medali bilan taqdirlangan. 2017-yil martida O‘zbekiston Prezidentining siyosiy-huquqiy masalalar bo‘yicha Davlat maslahatchisi etib tayinlangan. U 3-darajali davlat adliya maslahatchisi hisoblanadi.
Izoh (0)