29-oktabr kuni Moliya vazirligida Janubiy Koreyaning Aju universiteti vakillari bilan uchrashuv bo‘lib o‘tdi. Bu haqda vazirlik matbuot xizmati xabar berdi.
Janubiy Koreya tomondan uchrashuvda Aju universitetining xalqaro munosabatlar bo‘yicha prezidenti o‘rinbosari Jeyk Ik Lim, xaqlaro munosabatlar bo‘yicha professori Jun Xun Cho, xalqaro munosabatlar ofisi direktori Jey Yun Xim ishtirok etdi.
Uchrashuv chog‘ida Toshkentda Aju universitetining filialini ochish masalasi muhokama qilindi.
Qayd etilishicha, ushbu ta’lim dargohida talabalarga arxitektura, elektron muhandislik, muhandislik tizimlari qurilishi yo‘nalishlari bo‘yicha ta’lim beriladi.
Jeyk Ik Limning so‘zlariga ko‘ra, Aju universitetining Toshkentdagi filialiga 2019-yilning sentabr oyidan boshlab talabalar qabul qilina boshlaydi, kvotalar esa 420 nafar talaba qabul qilishga mo‘ljallangan.
Ta’lim ingliz tilida olib boriladi, bundan tashqari 2020-yilning sentabr oyidan boshlab koreys tilida ham ta’lim dasturlarini joriy etish rejalashtirilgan.
O‘z navbatida moliya vazirligi ushbu loyihani amalga oshirishda har tomonlama ko‘maklashishga tayyorligini bildirdi. Shuningdek, O‘zbekiston hukumati talabalar uchun grant dasturlarini ham joriy etishni rejalashtirmoqda.
Izoh (0)