“Lester” xo‘jayinining vertolyoti halokati natijasida Tailand go‘zallik qirolichasi halok bo‘ldi

Tailandning go‘zallik qirolichasi Nusara Suknamay Angliyaning “Lester” klubi xo‘jayini bilan halokatga uchragan vertolyot bortida bo‘lganligi ma’lum bo‘ldi, deb yozadi Tengrinews.

Qayd etilishicha, vertolyot bortida “Lester” xo‘jayini Vishay Shrivadanaprabxadan tashqari yana 4 kishi bo‘lgan. Ulardan ikki nafari milliarderning xodimi — Nursara Suknamay va Kaveporn Punpare bo‘lgan. Bundan tashqari uchuvchi Erik Svaffer va yo‘lovchi Izabela Roza Lechovich bortda bo‘lgan. Ularning barchasi halok bo‘lgani tasdiqlandi.

Nusara Suknamay 1985-yil 6-mayda Bangkokda tug‘ilgandi. U go‘zallik ko‘rik-tanlovlari — Miss Thailand Universe 2005 va Miss Photogenic of MTU 2005 g‘olibi edi.

Eslatib o‘tamiz, mazkur aviahalokat 27-oktabr sanasida “Lester”ning “Vest Hem”ga qarshi 10-tur o‘yinidan so‘ng sodir bo‘lgandi.