Sirdaryo viloyatining Oqoltin tumanida yosh tadbirkor Doniyor Toshpo‘latov Afrika tuyaqushlarini parvarishlamoqda. Bu haqda O‘zA xabar berdi.
Tashkil etilganiga endi yarim yil bo‘lgan “Bahodir o‘g‘li Doniyor” mas’uliyati cheklangan jamiyati Afrika tuyaqushini ko‘paytirish va tikuvchilik yo‘nalishida faoliyat yuritadi.
— Uydagilar bilan maslahatlashib, dastlab tikuv sexi ochmoqchi bo‘ldik. Internetdan zamonaviy tikuv sexlari loyihasini izlash jarayonida Farg‘ona vodiysida tuyaqush boqilayotgani to‘g‘risidagi xabar e’tiborimni tortdi, — deydi mazkur MChJ rahbari Doniyor Toshpo‘latov. — Shundan so‘ng bu borada ham ma’lumot to‘play boshladim. Bitta tuyaqush bir yilda 100 tagacha tuxum berar ekan. Katta tuyaqush 160-180 kilogacha go‘sht qiladi. Go‘shti shifobaxsh va parhezbopligi sabab, narxi ham arzon emas. Bir dona tuyaqush tuxumi 100 dollargacha, polaponi esa 200 dollargacha baholanar ekan. Shunday qilib, biznes-rejamizga o‘zgartirish kiritdik. Bankdan 125 million so‘m kredit oldik. Dastlab 9 tuyaqush olib keldik. Bosqichma-bosqich ular soni 50 dan oshdi.
Yosh tadbirkorning ta’kidlashicha, tuman hokimligi mutasaddilari tuyaqush yemishi uchun ekin ekishga yer so‘rab qilgan murojaatini e’tiborsiz qoldirgan. Bugun tadbirkor tuyaqushlarini parvarishlash uchun vodiydan arpa, bug‘doy va makkajo‘xorining yanchilgan doni aralashmasidan tayyorlangan maxsus yemishning har kilosini 5 ming so‘mdan sotib olmoqda. 1 yashar bitta tuyaqushga kuniga 3-4 kilogacha yemish zarurligi hisobga olinsa, chiqim ko‘payib boraverishi turgan gap. Qolaversa, bankdan olingan kreditni ham qaytarish kerak.
— Noiloj, mablag‘ zarurligidan 8 tuyaqushni sotishga majbur bo‘ldim, – deydi Doniyor Toshpo‘latov. — Yer ajratish masalasi 5-6 oydan buyon cho‘zilmoqda, tuman hokimiga vaziyatni tushuntirib, murojaat jo‘natdim. Hokim menga telefon qilib, 20 gektar ekin uchun hozircha 1 gektar yaylov ajratib berishini aytdi. Ajratib beriladigan yerga zudlik bilan arpa, bug‘doy, go‘ja, makkajo‘xori, beda ekishga kirishaman. Xudo xohlasa, bu yog‘iga ish yurishib ketishiga umid qilaman.
Yo‘lga qo‘yilgan ushbu tadbirkorlik tufayli ishsiz oila a’zolari, 3 nafar mahalla yoshlari ishli bo‘ldi. Kiyim-kechak tikishga mo‘ljallangan 2 qavatli tikuv sexi qurilishi yakunlanmoqda. Sex ishga tushirilsa, yana 4 nafar xotin-qizning bandligi ta’minlanadi.
Yosh tadbirkor kelgusida tuyaqush yemishini yetishtirish, to‘yimli qorishmani ham shu yerda tayyorlash uchun uskuna xarid qilishni rejalashtirgan. O‘shanda parvarish ancha arzonga tushadi. Shuningdek, kelasi yili inkubator tashkil etib, tuyaqush tuxumlarini ochirish tajribasini ham qo‘llab ko‘rmoqchi.