Germaniyadagi qurg‘oqchilik hukumatni strategik neft zaxiralarini ochishga majbur qildi

Germaniya hukumati mamlakatning bir qator federal yerlarini neft mahsulotlari bilan ta’minlash maqsadida strategik neft zaxiralarini ochishga qaror qildi. Bunga yozning nisbatan qurg‘oqchil kelgani, buning oqibatida Germaniyaning asosiy daryosi — Reyndagi suv sathi keskin pasayib ketgani sabab bo‘ldi, deya xabar bermoqda “Kommersant”.

Bu yil tankerlar va neft quyish kemalari daryoga kirish uchun yo yoqilg‘i yukini kamaytirishi kerak, yo‘qsa umuman daryo bo‘ylab suza olmaydi. Qayd etishlaricha, Germaniyaning neft xomashyosi va neft mahsulotlari strategik zaxirasi bundan 40 yil avval tashkil etilgan bo‘lib, o‘tgan vaqt davmida faqat uch marta ochilgan.

Mamlakatning strategik zaxirasida 24 million tonna neft xomashyosi va neft mahsulotlari mavjud. Ushbu zaxira avtomobil va havo transporti faoliyatini 90 kun davomida uzluksiz ta’minlab turish uchun zarur. Undan, shuningdek, kimyoviy mahsulotlar ishlab chiqarishda xomashyo sifatida ham foydalaniladi.

Germaniya iqtisodiy vazirligidan ma’lum qilishlaricha, ushbu chora preventiv bo‘lib, faqat bir necha federal yerni qamrab oladi, xolos. Vazirlik ma’lumotlariga ko‘ra, bunda keng miqyosli inqiroz haqida so‘z borayotgani yo‘q.