25-oktabr kuni Surxondaryo viloyatida mahalliy sharoitda yetishtirilgan sifatli paxta tolasidan tayyor mahsulot ishlab chiqarishga ixtisoslashgan yana bir yangi korxona foydalanishga topshirildi. Bu haqda Surxondaryo viloyati hokimligi matbuot xizmati “Daryo”ga ma’lum qildi.
Denov tumanidagi “Shashmoxkashob Tekstil” MChJ yiliga 6 ming tonna ip-kalava ishlab chiqarish quvvatiga ega. O‘n million dollardan ortiq qiymatdagi to‘qimachilik mahsulotlari eksport qilinadi. Uning ishga tushirilishi 300 ta ish o‘rni yaratish imkonini berdi.
2019-yilda mazkur korxonani kengaytirish hisobidan yiliga 7 million pogonometr trikotaj va to‘quvchilik mahsulotlari ishlab chiqarishni yo‘lga qo‘yish, qo‘shimcha 350 yangi ish o‘rni yaratish ko‘zda tutilmoqda.
“Shashmoxkashob Tekstil” MChJning tantanali ochilish marosimida ishda fidoyilik ko‘rsatgan xodimlarning bir guruhiga esdalik sovg‘alari topshirildi.
Mehmonlar korxona faoliyati bilan yaqindan tanishdi.