Joriy yilning 28-oktabridan 1-noyabrigacha Toshkent, Samarqand va Buxoro shaharlarida “O‘zbekiston-Rossiya forumi. Hamkorlik, tashabbus va innovatsiya” deb nomlangan yoshlar festivali bo‘lib o‘tadi. Bu haqda O‘zbekiston Yoshlar ittifoqi matbuot xizmati “Daryo”ga xabar berdi.
Festival Toshkent, Samarqand va Buxoro shaharlarida bo‘lib o‘tadi.
O‘zbekiston Yoshlar ittifoqi hamda Rossiya yoshlar ittifoqi hamkorligida o‘tkazilayotgan mazkur tadbirda ikki mamlakat yoshlari turizm, ommaviy axborot vositalari hamda tadbirkorlik sohalari doirasida o‘zaro malaka almashadi.
Bundan tashqari, O‘zbekistonning turistik salohiyatini namoyon etadigan sayohatlar, hunarmandlar ko‘rgazmalari, milliy kuy va raqslarga boy madaniy dasturlar ham festivaldan o‘rin egallagan.
Turizm, tadbirkorlik va ommaviy axborot vositalari borasida so‘z yuritiladigan ilmiy-amaliy anjumanlar esa ikki mamlakat yoshlarining malakasini oshirishga, o‘zaro tajriba almashishiga samarali platforma bo‘la oladi.
Qayd etilishicha, ushbu festivalni munosib tashkil etish uchun O‘zbekiston Yoshlar ittifoqida qizg‘in tayyorgarlik ishlari olib borilmoqda.
Besh kun davom etadigan festivalning dastlabki kunida Toshkent shahri bo‘ylab ekskursiya dasturi, jumladan, Temuriylar tarixi davlat muzeyi, Hazrati Imom majmuasiga ziyorat, O‘zbekiston Yoshlar ittifoqi rahbariyati bilan uchrashuv, festivalning rasmiy ochilish marosimi va turli madaniy tadbirlar o‘tkaziladi.
Izoh (0)