Rossiya kompaniyasi Surxondaryoda 472 mln dollarga issiqxona barpo qiladi

Rossiyaning yirik “Eko-kultura” kompaniyasi O‘zbekistonda pomidor ishlab chiqarishni yo‘lga qo‘yadi, deb xabar beradi “Podrobno.uz”.

Bu haqda yirik sabzavot kompaniyasining prezidenti Aleksandr Rudakov ma’lum qilgan. Ma’lum bo‘lishicha, mazkur agrokompleks 2019-yilda Surxondaryo viloyatida ishga tushiriladi. Issiqxona maydoni 314 gektarni tashkil etadi. Uning qurilishi uchun esa 472 million dollar yo‘naltiriladi. Issiqxona uchun yer maydonining ma’lum qismi sotib olingan, ma’lum bir qismi esa ijaraga olingan. Shuningdek, loyiha borasida Rossiya hamda O‘zbekiston banklari bilan muzokaralar davom etmoqda.

Bundan tashqari kompaniya 92 million dollarni 1000 gektar bog‘ barpo qilish uchun sarflaydi. U yerda yetishtiriladigan mahsulotlarning 40 foizi Rossiyaga, 60 foizi esa Xitoy, Janubiy Koreya va Yaponiya kabi davlatlarga eksport qilinadi.

Ma’lumot uchun, “Eko-kultura” Rossiyaning eng yirik sabzavot ishlab chiqaruvchilaridan biri hisoblanadi.