Abonentlarni sifatli mobil aloqa va internet bilan ta’minlash, shubhasiz, Ucell mobil operatori oldida turgan muhim vazifalar hisoblanadi. Ammo, shu bilan bir qatorda, o‘z mijozlariga qulay va sifatli xizmat ko‘rsatilishini yo‘lga qo‘yish ham kompaniya uchun muhim ahamiyatga ega.
16-oktabr kuni, sovuq va bulutli ob-havoga qaramasdan, Qo‘qon shahri aholisi Ucell uyali aloqa operatorining abonentlarga xizmat ko‘rsatishga mo‘ljallangan yangilangan ofisi ochilish marosimiga tashrif buyurdi. Yangilangan ofis qo‘qonliklarni bayramona kayfiyat bilan iliq kutib oldi. Zamonaviy interyer dizayni va abonentlarga xizmat ko‘rsatishda qo‘shimcha qulaylik yaratadigan yangiliklar, misol uchun elektron navbat tizimi ofisga kelganlarning e’tiborini jalb qilardi.
An’anaga binoan ochilish marosimi Ucell kompaniyasi top-menejerlari va Farg‘ona viloyati hokimi o‘rinbosarining nutqlaridan boshlandi hamda ular qizil tasmani tantanali kesgan holda yangilangan ofisni ochib berdilar. Shundan keyin chiroyli raqslar, orombaxsh qo‘shiqlar, qiziqarli tanlovlarni o‘z ichiga olgan shou-dastur o‘tkazilib, mehmonlarning olqishlari marosimga bayramona shukuh bag‘ishladi. Quvnoq kayfiyat va ajoyib bayramona ruh tashkilotchilar, ishtirokchilar va mehmonlarni shu qadar qamrab olgan ediki, hamma to‘satdan kelgan sovuq havo haqida unutib yubordi.
Marosimga kelgan aholining ko‘pchiligi Ucell kompaniyasidan yoqimli sovg‘alar va chiroyli raqamlar bilan uyga qaytdi, ofisga birinchi bo‘lib tashrif buyurgan 10 nafar mehmonlarga esa mobil operatorning maxsus sovg‘alari topshirildi!
Odamlar OAV bilan chin ko‘ngildan suhbat qilishdi, intervyu berishdi va kompaniya xodimlari bilan o‘z taassurotlarini baham ko‘rishdi. Qo‘qon shahri Yoshlar ittifoqi a’zosi, Komolov Doniyorjon ushbu tadbirni quyidagicha ta’rifladi: “Ucell ofisining ochilishi bugun biz uchun chinakam bayramga aylandi. Mobil operatorga sovg‘alar va ajoyib kayfiyat uchun minnatdorchilik bildiraman. Kelgusi faoliyatida muvaffaqiyatlar tilayman!”.
Mahalliy televideniyega berilgan interyu asnosida, Ucell kompaniyasining Bosh direktori Tonu Gryunberg shunday dedi: “Qo‘qondagi ofisning yangilanishi biz uchun mijozlarga yaqin bo‘lish va ularga o‘z xizmatlarimizni eng yuqori darajada taqdim qilish qanchalik muhimligini ko‘rsatishda yaxshi imkoniyat bo‘ldi. Umid qilamanki, endilikda Qo‘qon aholisi uchun bizning ofislarda xizmat ko‘rsatilishi yanada qulay va yoqimli bo‘ladi”.
Biz esa navbatdagi ochilish marosimlarini kutib qolamiz!
Reklama huquqi asosida
Izoh (0)