Navoiyda “Dudbo‘ronlarni tozalash 10 kunligi” e’lon qilindi

Joriy yilning 20-oktabrdan 30-oktabrga qadar Navoiy viloyatida “Dudbo‘ronlarni tozalash 10 kunligi” e’lon qilindi. Bu haqda “Daryo”ga Navoiy viloyati favqulodda vaziyatlar boshqarmasi xabar berdi.

Bundan maqsad aholi o‘rtasida tabiiy va is gazlaridan zaharlanish hamda xonadonlarda havo-gaz aralashmasi chaqnashi bilan bog‘liq favqulodda vaziyatlarning oldini olish.

Mazkur tadbir doirasida joriy yilning 18-oktabr kuni Nurota tumani “Mustaqillik” MFYda “Kuz-qish mavsumida aholi o‘rtasida tabiiy va is gazlaridan zaharlanish va binolarda havo-gaz aralashmasi chaqnashi bilan bog‘liq favqulodda vaziyatlarning oldini olish chora-tadbirlari” mavzusida ko‘rgazmali amaliy seminar o‘tkazilgan.

Seminarda Nurota tumani “Mustaqillik” MFY aholisi, tumandagi barcha mahalla fuqarolar yig‘inlari raislari, maktablar va maktabgacha ta’lim muassasalari rahbarlari va xo‘jalik mudirlari – jami 193 kishi ishtirok etdi.

Shuningdek, amaliy tadbirlar davomida 122 ta xonadondagi tabiiy gaz tarmoqlari va jihozlari nazoratdan o‘tkazilib ta’mirlandi va dudbo‘ronlarni tozalandi.

Ko‘rgazmali amaliy seminarlarni viloyatning barcha shahar va tumanlarida o‘tkazilishi rejalashtirilgan.