Toshkent shahrining Mirzo Ulug‘bek tumanidagi 433-sonli MTMning 37 nafar tarbiyalanuvchisi bundan bir necha kun oldin oziq-ovqatdan zaharlanishi oqibatida kasalxonaga yotqizilganligi haqida xabar berilgan edi. Maktabgacha ta’lim vazirligi ushbu holat yuzasidan o‘rganishlar natijasini e’lon qildi.
Hozirgi vaqtda barcha bolalar kasalxonadan chiqarildi. Bolalardan tahlil namunalari olinib, Davlat sanitariya-epidemiologiya nazorati (DSEN) bakteriologik laboratoriyasiga yuborildi.
DSEN xulosasi bo‘yicha Laboratoriya tahlili natijalari “Ovqat tayyorlash texnologiyasining qo‘pol buzilishi va sanitar qoidalarga rioya qilmaganlik sababli, 2018-yilning 5-oktabrida 433-sonli MTMning oshpazlari tomonidan tayyorlangan “teftellar” da ehtimol “Shigella Flexner 1b serotipi” (xalqaro kasalliklari tasnifi bo‘yicha A05.8) ovqatdan zaharlanishni keltirib chiqargan.
Ammo aynan Shigella Flexner oqibatida ovqatdan zaharlanishning dastlabki tashxisi to‘liq tasdiqlanmagan. Tashxis natijalariga ko‘ra, 37 nafar boladan faqat 6 nafarida ushbu mikroorganizm aniqlandi.
Shuningdek maxsus sovutgichdagi qopqoqli steril shisha idishlarda saqlanadigan kunlik ovqat namunalari ham tekshirildi. Namuna so‘nggi ovqatlanishdan 72 soat keyin (8-oktabrda) olingan. Uzoq vaqt o‘tganiga qaramay, laboratoriyada bakteriologik tekshiruvlar ovqat namunasidan “Shigella Flexner”ni topmadi.
DSEN xulosasidan:
- Laboratoriya tekshiruvlari natijalariga ko‘ra, sanitariya me’yorlariga amal qilinmaganligi aniqlandi. Ya’ni 2 ta namunada (xom go‘sht va sutli kakaoda), ichak tayoqchalari bakteriyalari guruhi (ITBG), ichak mezofil aerob va fakultativ anaerob mikroorganizmlari (IMAFAM) aniqlandi.
- Jamoat oshxonasidagi 66 ta mikrobiologik yuvish tahlillardan 28 tasida ITBG aniqlandi, bu esa texnologik uskunalar va idishlarning bakterial ifloslanishini ko‘rsatadi
- Guruhlarda tanlangan 57 ta yuvish tahlillardan 18 tasida idishlarning bakterial ifloslanishini ko‘rsatadigan ITBG aniqlandi
- Bolalar va xodimlardan ichak guruhiga mansub infeksiyalarni aniqlash uchun to‘satdan 167 namuna tekshirish uchun olindi (laboratoriya natijalari bo‘yicha salbiy natijalar yo‘q).
- Epidemiologik tekshirish va laboratoriya tadqiqotlari natijalari muassasaning oshxonasida sanitariya me’yorlari va qoidalariga rioya qilmaslikni ko‘rsatmoqda
Bunday bakteriyalar odamlarga ifloslangan oziq-ovqat mahsulotlarini (xom go‘sht yoki qiyma, xom-sut, ifloslangan xom-sabzavotlarning yetarli termik ishlov berilmaganligi) iste’mol qilish yo‘li bilan yuqadi.
Bakteriyalar 70 darajadan yuqori haroratlarda ovqat mahsulotlarini termik qayta ishlaganda halok bo‘ladi.
Tekshiruv natijalariga ko‘ra, MTM ning 15 nafar xodimi, rejali tibbiy ko‘rikdan o‘tmaganligi uchun ishdan bo‘shatildi.
Hamshira va barcha oshxona xodimlari ham ishdan bo‘shatildi. MTM rahbarining lavozimiga mos kelish masalasi ko‘rib chiqilmoqda.
Aniqlangan qoidabuzarliklar bo‘yicha materiallar Bosh prokuraturaga berildi.
Izoh (0)