Jizzaxda bug‘doy o‘g‘rilariga sud hukmi o‘qildi

Shu yilning may oyi oxirlarida “Jizzaxdonmahsulotlari” aksiyadorlik jamiyatida don o‘g‘rilari ushlangan edi, deb xabar beradi Jizzax viloyati IIB matbuot xizmati.

“Voqea joyida, jinoyat ustida qo‘lga olingani bois o‘g‘rilarning shaxsini aniqlash xamirdan qil sug‘urgandek oson kechdi — hammasi shu korxonada turli vazifalarda ishlab, ro‘zg‘or tebratib kelayotgan odamlar ekan.

Sharof Rashidov tumanida yashovchi, “Jizzaxdonmahsulotlari” AJ da ishlovchi beshovlon — A.H., U.P., J.Q., S.S. va O.S.lar oldindan til biriktirib, bir guruh bo‘lib, 2018-yil 29-maydan 30-mayga o‘tar kechasi soat 24:00 larda Jizzax shahridagi Bunyodkor mahallasida joylashgan “Jizzaxdonmahsulotlari” AJ ga o‘g‘rilikka tushdi. Jinoiy guruh korxonaning teplovoz mashinisti S.S. yordamida vagonni yashirin ravishda olib chiqib, “G‘alla-Alteg” AJga jo‘natilishi kerak bo‘lgan 8 million 197 ming 200 so‘mlik 12,42 tonna bug‘doyni o‘g‘irlab olib ketmoqchi bo‘lgan. Ammo ular bunga ulgurmadi — Jizzax viloyat IIB QB xodimlari don o‘g‘rilarini voqea joyida qo‘lga oldi”, — deyiladi xabarda.

A.H., U.P., J.Q., S.S. va O.S. larga O‘zbekiston Respublikasi JK 25,169-moddasi 2-qismining “v” bandida ko‘rsatilgan jinoyatni sodir qilganliklari bo‘yicha jinoyat ishi qo‘zg‘atildi. Sud majlisida sudlanuvchilar ayblariga to‘liq iqrorlik bildirib, qilmishidan pushaymonligini, bunday qilmishni takrorlamasligini, yetkazilgan zarar qoplanganligi haqida ko‘rsatuv berib, yengillik berishni so‘radi.

Jinoyat ishlari bo‘yicha Jizzax shahar sudi 2018-yil 13-avgustda hukm chiqardi. A.H., U.P., J.Q., S.S. va O.S. lar O‘zbekiston Respublikasi JK 25,169-moddasi 2-qismining “v” bandi bilan jinoyatni sodir qilganlikda aybli deb topildi, biroq ularning harakatlarida jazoni og‘irlashuvchi holatlar yo‘qligi inobatga olindi, shaxsining ijobiy tavsiflanganligini, yetkazilgan zarar qoplanganligi, aybiga iqror bo‘lib, qilmishidan pushaymonligi jazoni yengillashtiruvchi holatlar deb hisobga olinib, JK 25,169-moddasi 2-qismining “v” bandi sanksiyasida nazarda tutilgan axloq tuzatish ishi jazosi tayinlandi.