Toshkentning Yunusobod tumanida joylashgan Shoshtepa arxeologik yodgorligi tarixiy manbalarda IV-VIII asrlarga oidligi qayd etiladi, deb yozadi O‘zA.
Ayni vaqtda davlat muhofazasiga olingan bu tepalik e’tibortalab hududga aylanib bormoqda.
Bu tarixiy tepalik qadimgi Toshkent xavfsizligini asrash uchun muhim qo‘rg‘onlardan biri hisoblangan. Baland tepalikning uch tomoni chuqur handaqlar bilan o‘ralgani bois, u harbiy istehkom vazifasini o‘tagan. Obidaning maydoni bir paytlar 30 gektar, uzunligi esa 300 metrni tashkil qilgan.
Bu yerdagi qisqa muddatli arxeologik qazishma ishlariga guvoh bo‘lganlarning so‘zlariga ko‘ra, qarorgoh vazifasini o‘tagan tepalikdagi bino yirik devorlardan iborat bo‘lgan. Bu tepalikdan o‘q-yoy qoldiqlari, turli ishlarda foydalanish mumkin bo‘lgan sopol buyumlar topilgan.
Toshkent shahrining tarixi aynan shu tepalikdan boshlanishini e’tiborga olsak, bu obidaning o‘tmishi va ahamiyati juda muhim. Shunday uzoq tarixga ega tepalik bugun qarovsiz ahvolda. E’tiborsizlik natijasida tepalik borgan sari nurab boryapti. Bugun uning hududi 2—3 sotix keladi, xolos.
O‘zbekiston “Milliy tiklanish“ demokratik partiyasi tomonidan hududlardagi tarixiy va madaniy meros obyektlarini inventarizatsiya qilish hamda ularning bugungi holatini o‘rganish yuzasidan amaliy sa’y-harakatlar olib borilmoqda. Partiyaning Toshkent shahar kengashi ham bu kabi xayrli ishlar natijasini umumlashtirib, ayrim madaniy obyektlarning bugungi achinarli ahvoli yuzasidan kerakli tashkilotlarga ma’lumotlar bermoqda.
“Tariximizni saqlab qolish, kelajak avlodga biz, buyuk tarixga ega ekanligimizni ko‘rsatish uchun bu kabi madaniy obyektlarni asrashga e’tiborliroq bo‘lishimiz lozim. Ushbu tepalikda mahalliy aholi vakillari muntazam obodonlashtirish ishlarini olib boradi. Ammo buning o‘zi yetarli emas”, — deyiladi xabarda.
O‘zbekiston Respublikasining “Madaniy meros obyektlarini muhofaza qilish va ulardan foydalanish to‘g‘risida“gi qonunida “Tarixiy manzilgoh hududi doirasida shaharsozlik, xo‘jalik faoliyati va boshqa faoliyat moddiy madaniy meros obyektlari va mazkur manzilgohning boshqa qimmatli xususiyatlarini saqlab qolish sharti bilan amalga oshirilmog‘i lozim“, deb belgilab qo‘yilgan.
Bu yerda ko‘p qavatli uylar, xizmat ko‘rsatish obyektlari va kichik sanoat korxonalarining qurilishi obida hududining kichrayib ketishiga olib kelmoqda. Loqayd odamlar ogohlantirishlarga qaramay, tepalik atrofiga hamon maishiy chiqindilarni tashlab ketmoqda.
Yo‘qolib borayotgan bu madaniy obyekt hali o‘rganish va tadqiqotlarga muhtoj. Uni asrab qolish va avlodlarga yetkazish uchun bugun harakat boshlash kerak.
Izoh (0)