Bugun, 12-oktabr kuni Dushanbeda Shanxay Hamkorlik Tashkiloti Hukumat rahbarlari kengashi majlisi bo‘lib o‘tadi, deb yozadi Asia-Plus.

Foto: Asia-Plus

Uchrashuv bosh kotib va tashkilotning Mintaqaviy aksilterrorchilik markazi ijroiya qo‘mitasi direktori ishtirokida ShHTga a’zo davlatlar hukumat rahbarlarining tor tarkibi bilan boshlanadi. Yalpi majlisda ularga kuzatuvchi davlatlar, qator xalqaro tashkilotlar vakillari hamda SHHT banklararo birlashmasi va ishbilarmonlar kengashi rahbarlari qo‘shiladi.

Yig‘ilish kun tartibidan savdo-iqtisodiy va gumanitar aloqalarning hozirgi holati va istiqbollari, ularni rivojlantirish bo‘yicha chora-tadbirlar, ko‘p tomonlama savdo-iqtisodiy hamkorlik dasturini amalga oshirishning borishi, ShHT doirasidagi loyihalash faoliyatini moliyaviy ta’minlash mexanizmlari to‘g‘risida fikr almashish o‘rin olgan.

Shuningdek, Hindiston, Pokiston, Qirg‘iziston, Qozog‘iston, Rossiya, Tojikiston, Xitoy, O‘zbekiston hukumat rahbarlari hamda ShHT Ishbilarmonlar kengashi va Banklararo birlashmasi faoliyatini, tashkilotning 2019-yil uchun budjetini, ShHT HRK keyingi majlisi muddati va joyini muhokama qilish, mazkur masalalar bo‘yicha tegishli qarorlar qabul qilinishi rejalashtirilgan.

ShHT Hukumat rahbarlari kengashi raisligi Tojikistondan O‘zbekistonga o‘tkaziladi.