Bugun, 11-oktabr sanasida ham Buenos-Ayres shahrida III yozgi Olimpiya o‘yinlari davom etmoqda. Musobaqa doirasida gimnastika bo‘yicha mikst musobaqalari o‘tkazildi. Bellashuvlarda O‘zbekiston terma jamoasining eng yosh sportchisi Indira O‘lmasova (14 yosh) ham ishtirok etdi va bronza medali sohibasiga aylandi.

Foto: MOQ matbuot xizmati

Indira O‘lmasova qur’a natijalariga ko‘ra o‘zbekistonlik afsona – Oksana Chusovitina sharafiga nom olgan jamoa safida bellashuvlarda qatnashdi. Ushbu bahslarda sportchilar aralash juftlik, trampolin, badiiy gimnastika, sport gimnastikasi bo‘yicha kurash olib boridi. Indira bilan birgalikda “Oksana Chusovitina” jamoasi safida AQSh, Buyuk Britaniya, Misr, Gvatemala, Shvetsiya, Avstraliya, Yaponiya, Germaniya, Argentina hamda Gretsiyadan tashrif buyurgan sportchilar ishtirok etdi. Indira musobaqa davomida tayanib sakrash, brus, xodadagi va erkin mashqlar bo‘yicha chiqish qildi.

​Musobaqada birinchi o‘rinni “Simona Baylz” jamoasi egalladi. Ikkinchi o‘rindan “Maks Uitlok” jamoasi vakillari joy olishdi. “Oksana Chusovitina” jamoasi esa kuchli uchlikka yakun yasab berdi.

Ma’lumot uchun, bungacha O‘zbekiston terma jamoasi safida Ulug‘bek Rashitov (taekvondo, kumush) va Nilufar Yermagambetova (dzyudo, bronza), Jayhunbek Nazarov (dzyudo, oltin) terma jamoa hisobiga medallar qo‘shib qo‘ygandi.