“Toshshahartransxizmat” AJ va uning tarkibidagi korxonalarda haftaning har juma kuni xizmat mashinalaridan foydalanish ta’qiqlanadi. Bu haqda jamiyat matbuot xizmati ma’lum qildi.
Shu kuni barcha rahbarlar va boshqa xodimlar o‘zlariga ajratilgan xizmat avtomobillaridan foydalanmagan holda jamoat transportida ishga keladi va kun davomida ehtiyojga qarab jamoat transportidan foydalanadi.
Vaziyat taqazosi bilan boshqa kunlarda ham rahbarlar erta tongdan avtobusda yurib, transport xizmati sifatiga yo‘lovchi nazari bilan e’tibor qaratadi. Bu jarayonda yo‘lovchilar kayfiyati, ularning noroziligiga sabab bo‘layotgan muammolarni o‘rganadi.
Bundan ko‘zlangan asosiy maqsad har bir rahbar oddiy yo‘lovchi sifatida avtobusda kechadigan jarayonlarni bevosita kuzatishi, u yerdagi muammolarni yurakdan his etishi ekanligi bildirilmoqda.
Tizim rahbariyati bu jarayonda haydovchi va chiptachilarning maxsus kiyimdaligi, tashqi ko‘rinishi sanitariya va gigiyena talablariga mosligi, yo‘lovchilarga ko‘rsatilayotgan muomala madaniyati, yo‘l harakati qoidlariga amal qilinishi, oraliq bekatlarda ortiqcha turib qolish kabi qator masalalar ustidan nazorat olib boradi. Aniqlangan kamchilik va maummolardan kelib chiqib, zarur chora-tadbirlar belgilanadi.
Izoh (0)