Oktabr oyining oxirgi 10 kunligida O‘zbekistondagi barcha OTMlar (xorijiy OTMlar filiallari ham) o‘rtasida “Zakovat” intellektual o‘yini bo‘yicha “Talabalar kubogi” tashkil etiladi. Bu haqda huquqshunos Xushnudbek Xudayberdiyev o‘z Telegram-kanalida ma’lum qildi.
“Har bir OTMdan 7 nafardan iborat bittadan jamoa ishtirok etadi. Intellektual turnir 2 bosqichda bo‘lib o‘tadi:
1-bosqich – mintaqaviy saralash bosqichi; 2-bosqich – Respublika bosqichi.
Mintaqaviy saralash bosqichida respublika bo‘ylab 4 ta mintaqa doirasida jamoalar o‘zaro kuch sinashadi.
Bular quyidagilar:
1-mintaqa – Samarqand, Qashqadaryo, Surxondaryo, Jizzax viloyatlari jamoalari (Samarqand shahrida, 22-oktabr);2-mintaqa – Qoraqalpog‘iston Respublikasi, Buxoro, Navoiy va Xorazm viloyatlari jamoalari (Buxoro shahrida, 24-oktabr);3-mintaqa – Farg‘ona, Andijon, Namangan viloyatlari jamoalari (Farg‘ona shahrida, 26-oktabr);4-mintaqa – Toshkent shahri, Sirdaryo hamda Toshkent viloyatlari jamoalari (Toshkent shahrida, 28-oktabr).
Toshkent mintaqasida o‘tkazilgan saralash bosqichida dastlabki 6 ta o‘rin, qolgan har bir mintaqaviy saralash bosqichida dastlabki 3 ta o‘rinni egallagan jamoalar respublika bosqichiga yo‘llanmani qo‘lga kiritadi”, — deyiladi xabarda.
Respublika bosqichi noyabr oyida Toshkent shahrida bo‘lib o‘tadi va unda 15 ta jamoa ishtirok etadi.
Batafsil ma’lumotlar tez orada e’lon qilinadi.
Xabarga ko‘ra, respublika bosqichida chempion bo‘lgan jamoaning barcha 7 nafar talabasi Italiyaning Turin shahrida bo‘ladigan 1 haftalik o‘quv seminari uchun bepul yo‘llanmani qo‘lga kiritadi. Shuningdek, respublikada chempion bo‘lgan OTM jamoasi “Zakovat” intellektual ko‘rsatuvining ekran orqali bo‘lib o‘tadigan Oliy liga o‘yinlarida to‘g‘ridan-to‘g‘ri ishtirok etish masalasi ham ko‘rib chiqilmoqda.
Mintaqalarda g‘olib bo‘lgan OTM jamoalari esa ekran orqali bo‘ladigan “Urfon-shou” ko‘rsatuvida ishtirok etish huquqini qo‘lga kiritadi.
Izoh (0)