Qozog‘istonda tadbirkorlar uchun muhr bekor qilindi

Qozog‘istonda davlat organlariga xususiy tadbirkorlik subyektlariga tegishli yuridik shaxslarning hujjatlarida muhr talab qilish taqiqlandi. Bu haqda Spot xabar bermoqda.

Biznes tejash imkoniga ega bo‘lishi uchun tadbirkorlik kodeksiga tuzatishlar kiritildi. Endi hujjatlarni tasdiqlash uchun xususiy tadbirkorlik subyektlari muhrdan foydalanishga majbur emas, mas’ul shaxs imzosining o‘zi yetarli.

Shu bilan birga, muhrdan foydalanish ham taqiqlanmagan.

“Xususiy tadbirkorlik subyektlari o‘z faoliyatida muhrdan foydalanish yoki o‘z xohishiga ko‘ra undan voz kechish huquqiga ega. Muhrdan foydalanmaslik huquqi xususiy tadbirkorlik subyektlarining davlat organlari va moliyaviy tashkilotlar bilan hamkorlikdagi jarayonlarini sezilarli darajada soddalashtiradi”, — deyiladi xabarda.

Shuningdek, tuzatishlarga ko‘ra, davlat organlari, moliyaviy tashkilotlar, shu jumladan ikkinchi darajali banklar muhrni hujjatning majburiy elementi sifatida talab qilish huquqiga ega emas. Ular xususiy tadbirkorlik subyektlarining faqat vakolatli shaxs imzosi bilan tasdiqlangan hujjatlarini qabul qilishga majbur.

Biznes yuritishni soddalashtirishni ta’minlashda tuzatishlar Jahon banki, shuningdek AQSh, Daniya, Norvegiya, Shvetsiya, Germaniya, Avstriya, Shveysariya, Buyuk Britaniya, Avstraliya, Kanada, Finlyandiya va Gruziya mamlakatlari tavsiyalariga asoslangan.