O‘zbekiston Prezidenti Shavkat Mirziyoyevning Hindistonga tashrifi doirasida Nyu Deli shahrida Kichik biznes va xususiy tadbirkorlik subyektlarining eksportini qo‘llab-quvvatlash jamg‘armasi o‘z vakolatxonasini ochdi. Bu haqda O‘zA xabar berdi.
Vakolatxonaning asosiy vazifasi Hindiston bozorida marketing tadqiqotlarini o‘tkazish, xorijiy hamkorlarni topish, mahalliy brendlar reklamasini ta’minlash, ko‘rgazma, yarmarka, tender savdolari va boshqa tadbirlarda tadbirkorlarning ishtirokini tashkillashtirishdan iborat.
Qolaversa, vakolatxona xorijlik ishbilarmon doira vakillarining yurtimizda biznes faoliyatini yuritish uchun yaratilgan sharoitlar haqidagi ma’lumotlar bilan tanishtirib, ularning o‘z sarmoyalarini kiritishga jalb qilishda faol ishtirok etadi.
Vakolatxona ochilishi munosabati bilan jamg‘armaning Nyu Deli shahridagi vakolatxonasi ko‘magida Hindistonning Aditya Export va O‘zbekistonning “O‘zbekiston Shampani” kompaniyasi o‘rtasida ilk shartnoma tuzildi. 1 million dollarga imzolangan shartnomaga ko‘ra, joriy yilning dekabr oyidan boshlab, mahsulotlar Hindistonga yetkazib beriladi.
Izoh (0)