Buxoroda velosiped o‘g‘irlagan fuqaro 5 yilga qamaldi
Olot tuman IIBga fuqaro N.A ariza bilan murojaat qildi, deb xabar beradi Buxoro viloyati IIB matbuot xizmati.
Fuqaro o‘z murojaatida 11-iyul soat 11:00 larda Olot tumani Olot ko‘chasida joylashgan “Aroma” shirinliklar savdo do‘koni oldida turgan ko‘k rangli narxi 500 000 (besh yuz ming) so‘mlik “Desna” rusumli velosipedni noma’lum shaxslar o‘g‘irlab, fuqaro N.A ga jami 500 ming so‘mlik miqdorda moddiy zarar yetkazganligini bildirgan.
Olib borilgan tezkor surushtiruv ishlari natijasida ushbu jinoyatni 1982-yilda Olot tumanida tug‘ilgan muqaddam bir necha marotaba o‘g‘rilik jinoyatini sodir qilganligi uchun sud tomonidan xavfli retsidivist deb topilgan fuqaro K.S sodir etilganligi aniqlangan.
Mazkur holat yuzasidan fuqaro K.S nisbatan O‘zbekiston Respublikasi JKning 169-moddasi (o‘g‘rilik) 3-qismining “a” bandiga asosan jinoyat ishi qo‘zg‘atilib tergov harakatlari olib borildi.
Tergov jarayonida sudlanuvchi K.S 11-iyul kuni Olot tumani “Turon” ko‘chasida yashovchi fuqaro Ch.N ning uyidan jami bahosi 1 227 000 so‘mlik moddiy boyliklarni o‘g‘irlab ketganligini o‘z aybiga iqrorlik arizasi orqali bayon qildi.Jinoyat ishlari buyicha Olot tuman sudi raisi N.Sharopov tomonidan ushbu jinoyat ishiga oid hujjatlar ko‘rib chiqilib, sudlanuvchi K.S.ga nisbatan 5 (besh) yil ozodlikdan mahrum qilish jazosi tayinlandi.
