Shavkat Mirziyoyev: Hindistonga tashrif va samarali muzokaralar strategik sheriklikni yangi bosqichga olib chiqadi

Hindiston prezidentining “Rashtrapati Bxavan” saroyida Shavkat Mirziyoyevni rasmiy kutib olish marosimi bo‘ldi. Bu haqda Prezident matbuot xizmati ma’lum qildi.

Davlat rahbarini Hindiston prezidenti Ram Nath Kovind va bosh vazir Narendra Modi kutib oldi.

Oliy martabali mehmon sharafiga faxriy qorovul saf tortdi. Prezident shohsupaga ko‘tarildi. Ikki mamlakat davlat madhiyalari yangradi.

Shavkat Mirziyoyev shu yerda ommaviy axborot vositalari vakillari uchun qisqacha bayonot berdi.

Davlat rahbari Hindiston prezidenti va bosh vaziriga taklif uchun minnatdorlik bildirib, xalqlarni tarixiy rishtalar, o‘xshash an’analar bog‘lab turishini ta’kidladi.

“Hindiston bugungi kunda jadal rivojlanib, jahon iqtisodiyotidagi o‘rnini mustahkamlab borayotgan global davlat. Biz oliy darajadagi uchrashuvlarimiz natijasida faollashib borayotgan O‘zbekiston va Hindiston munosabatlarining bugungi sur’atini yuqori baholaymiz. Ishonchim komilki, ushbu tashrif va samarali muzokaralar strategik sheriklikni yangi bosqichga olib chiqadi”, dedi Shavkat Mirziyoyev.