Urganchda Xorazm viloyati bilan Qozog‘istonning Mang‘istov viloyati hokimliklarining hamkorlikdagi biznes-forumi o‘tkazildi. Bu haqda O‘zA xabar bermoqda.
Forum avvalida Xorazm viloyati hokimi vazifasini bajaruvchi F.Ermanov Mang‘istau viloyati hokimi Ye. Tugjanov bilan uchrashdi. Unda hududlarning o‘zaro savdo-iqtisodiy va investitsiyaviy hamkorlik yo‘nalishlari, hamkorlikning bugungi holati va istiqbollari atroflicha muhokama qilindi.
Forumda ikki mamlakat davlat idoralari, sanoat sohasi vakillari va ishbilarmon doira vakillari ishtirok etdi. Xususan, Mang‘istau viloyatidan 60 dan ziyod qurilish, yengil sanoat, qishloq xo‘jaligi, tog‘-kon sanoati, metallurgiya kabi sohalarda faoliyat yuritadigan kompaniya va firma rahbarlari qatnashdi.
Tadbirda ikki viloyatning iqtisodiy salohiyati, imkoniyatlarini aks ettiruvchi videoroliklar namoyish etildi. Neft-gaz, transport-kommunikatsiya, qishloq xo‘jaligi, turizm, sanoat va ishlab chiqarish sohalarida hamkorlikni yanada kengaytirishga oid qator istiqbolli kelishuvlarga erishildi. Urganch bilan Aqtau shaharlari va “Hazorasp” erkin iqtisodiy zonasi bilan Aqtaudagi EIZlar o‘rtasida hamkorlik bitimlari shular jumlasidandir.
Izoh (0)