Oliy Majlisi Senatining o‘n oltinchi yalpi majlisida senatorlar Buxoro viloyati hokimining hududiy Kengashlar faoliyati haqidagi hisobotini eshitdi, deb xabar beradi O‘zA.
Qayd etilganidek, Prezidentning 2018-yil fevralda Buxoro viloyatiga tashrifi chog‘ida belgilangan vazifalarni hisobga olgan holda hududni ijtimoiy-iqtisodiy rivojlantirishga qaratilgan aniq maqsadli ishlar amalga oshirilmoqda.
2017-yil va joriy yilning o‘tgan davrida viloyatda 1 trillion 66 milliard 954 million so‘mdan ziyod investitsiyalar o‘zlashtirildi. Bundan tashqari, 2 ming 185 tadan ziyod loyiha amalga oshirilishi tufayli 21 ming 854 yangi ish o‘rni yaratildi.
O‘tgan vaqt davomida hududda qariyb 3 ming 800 xususiy tadbirkorlik va kichik biznes subyekti tashkil etildi. Ularning umumiy soni 14 ming 700 tadan oshdi. Tijorat banklari tomonidan ularga 2 trillion 157 milliard 400 million so‘mlik kredit mablag‘lari ajratilgan.
Yalpi majlisda viloyatdagi mavjud muammolarga ham e’tibor qaratildi. Jumladan, ichimlik suvi ta’minotini joylarda yanada yaxshilash, e’tibordan chetda qolayotgan ichki yo‘llarni ta’mirlash, turizmni rivojlantirish uchun yo‘lovchilarni tashuvchi transportlar qatnovi tizimini yanada rivojlantirishga oid takliflar bildirildi.
Senatorlar Buxoro viloyatini rivojlantirishga va xalq deputatlari mahalliy Kengashlari faoliyati samaradorligini oshirishga salbiy ta’sir ko‘rsatadigan qator muammo va kamchiliklar borligini, mavjud salohiyatdan to‘liq foydalanilmayotganini ta’kidladi.
Muhokama yakunlari bo‘yicha vazirliklar va idoralar, joylardagi ijro hokimiyati organlarining hududni rivojlantirish masalasini hal etish bo‘yicha mas’uliyatni oshirishga qaratilgan tegishli qaror qabul qilindi.
Izoh (0)